林子萱（Kiki）有鋪「儲卡癮」，「卡」是指明信片（postcard）。在短短三年裏，Kiki已收藏了500多張，當中她覺得最深刻的是想送給初戀男友的那張，而最特別是宣傳關懷愛滋的明信片。她還笑言自製的postcard是她追男仔的撒手鐧。
林子萱收藏明信片已有三年時間，藏品達500多張，日前她帶同部份珍藏到佐敦接受訪問。Kiki表示正式大量收集postcard是始於三年前的一次外遊，當時她覺得postcard十分特別，無論寄給朋友或自己也很有意思，自此便上了癮。
在芸芸500多張藏品中，有五張是Kiki特別鍾愛，當中以「關懷愛滋」在街上派發的避孕套postcard最特別，她說：「嗰陣時喺街度攞，張卡真係設計得好好，又好有意思。其他至愛包括我朋友設計嘅玲瓏浮凸嘅中國女仔postcard、設計簡單嘅『ILoveMe』，同埋喺澳洲買嘅保護樹熊postcard。」
不過，最令Kiki刻骨銘心的postcard，並不是近年搜羅的珍品，而是一張沒有寄出的postcard，那是95年澳洲在情人節推出的。Kiki本想把它送給當時的初戀男友，豈料男友剛要出埠，兩人要分隔異地，Kiki說：「本來諗住送畀佢，會係一件好sweet嘅事，但係最後我都冇送到。」
親自繪畫顯心思
Kiki自言有一招追男仔的撒手鐧，她笑說：「我試過親自繪畫postcard送畀三個心儀嘅男仔，由於我咁有心思，令到其中兩個男仔話好大壓力，所以大家就冇開始到，好在最後都成功同一個男仔開始，所以postcard唔只淨係儲咁簡單㗎。」
採訪：駱華齡 攝影：陳俊強
髮型：BluedyWongofHairCulture
化妝：KerryWong 服裝提供：Quicksilver
場地提供：Club27
