嘩！新Game：獨家試玩PSP《MPO》<br>新鬼祟動作唔用滅聲器槍　死路一條

嘩！新Game：獨家試玩PSP《MPO》
新鬼祟動作唔用滅聲器槍　死路一條

以前《MetalGearSolid》靠超凡玩法同引人入勝嘅古仔成為超級大作，但佢響PSP出咗三款唔係正統玩法嘅外傳，搞到好多支持者大感失望，結果廠方認認真真咁炮製咗呢隻既有原本系統特色嘅延續篇《MetalGearSolid:PortableOps》，又有手提機賣點嘅新一集，相信可以一洗頹風，成為PSP新一輪必煲勁作！
文：陳福榮

既然掛得「《MetalGear》之父」小島秀夫個牌頭，《MetalGearSolid:PortableOps》（簡稱《MPO》）絕對唔會係蠟鴨，故事交代番《MGS3》與《MGS4》之間嗰段空白期，想了解劇情，就唔可以錯過喇。
操作方面，除原有動作如貼牆、CQC，亦引入咗靜靜雞慢慢行等新動作，佢改良咗個雷達方式，唔再係單靠視域，而係加埋任何會發出嘅聲音，因此唔用滅聲器開槍簡直係死路一條；調轉嚟講敲牆引走啲人嘅應用率亦相應地提高唔少。
手提機通常玩半個鐘左右，將Gameplay分割為任務制，可以搭程車闖一關，只要難度調整得好，係利多於弊。玩家要「強行擄走」科學家或護士，等佢哋投誠，開發甚至治療等工作。今集可用Snake，連一般卒仔甚至靚女護士都能夠選用，當然佢哋能力就遠不及蛇叔咁勁抽喇，但都算係幾得意嘅。

●畫面各視窗嘅配置都類似前幾集，一俾人發現就要馬上走佬。

●今次個爆炸場面都好激，動作流暢。

Link機喪捉青蛙

雖然隻Game響日本係支援GPS配件，不過呢點肯定唔能夠喺香港實現，但廠方亦照顧到唔玩GPS嘅人，所以佢容許透過DownloadPlay嚟達成「一碟多打」，換言之成班朋友Gathering只要有人買咗《MPO》，就能夠齊齊享受潛入互片嘅樂趣，唔使嘥錢人人買一隻。
連線模式分為單人及隊制，再細分「九死一生混戰」同「捉青蛙」。「九死一生混戰」只係兩Team人嘅瘋狂殺戮，論趣味性就遠不及「捉青蛙」。「捉青蛙」唔係鬥要殺人多，而係鬥快喺版圖內搵番個青蛙公仔出嚟，不過搵到又未必好，事關只要俾人發現，就係咁攻擊你，有啲似電腦FPS好流行嘅搶軍旗方式。