如果要將地產代理同泰拳拉上關係，大家可能會聯想到，幾個經紀喺新盤售樓處外，為咗搶客而批踭飛膝……咪住，純粹講笑。實情係世紀21地產贊助咗下個月3號，喺沙田富豪花園遊樂會舉辦嘅「富德新人王決戰」。地產代理做善事、參加運動會就聽得多，點解會贊助泰拳賽事？
原來佢哋有前線員工係泰拳高手，好似世紀21奇豐物業董事張肇栓，習拳超過10年，係今年「富德搏擊王大賽」冠軍人馬，今次嘅決戰亦由佢統籌，公司打算向顧客送出十套VIP門券㖭。
張肇栓平時着住西裝斯斯文文，估唔到係泰拳高手。長實個馬鞍山新盤嵐岸，賣樓行動如火如荼，其他經紀行嘅朋友，喺售樓處門外見到奇豐物業嘅行家，記住咪咁搏啦。