侍仔：用「好睇過戲」形容今晚賽事真係正確不過，英超有安歷卡倒戈兵工廠！又有英冠葉士域治無龍門用。
招積域：你唔好睇小啲球會租借呀，有時影響都幾大。好似葉士域治咁，原本借到韋根個好龍門保尼特，聯賽戰績即刻回穩。但點知韋根正選龍門卻克蘭受傷，要即刻收番保尼特應急。今次老葉真係有排煩，陣中3個龍門冇一個具正選質素，作客對榜尾班士利都可能輸埋場波，主隊班士利可以偷雞，雖然𠵱家馬會開平手盤，但主隊都可捧。
老葉門將荒難全身而退
菠蘿文：係掂嘅就唔使平手，即係人哋讓埋龍門，都睇死你贏唔到。
招積域：雲格被英足總檢控「行為不檢」喎，今場作客主場王保頓，你話佢會唔會拎唔到分發脾氣？
重插安歷卡「首球」
侍仔：作客保頓都知難踢，加上保頓陣中有個棄將安歷卡，佢到𠵱家聯賽都未開齋，今場好有機會入波，馬會今場開「首球」，一於重插安歷卡首球。
招積域：我記憶中每當兵工廠棄將倒戈表現都係一般，但安歷卡平日行為咁高調，對以前老細都唔會手下留情，撐保頓再激嬲雲格！
菠蘿文：但阿仙奴歐冠最後7分鐘贏漢堡3:1，都叫做有運仔行吓；安歷卡又冇狀態，我就覺得唔會威脅到兵工廠龍門，「和局」居多，作客嘅情況，都係運氣行先，倒戈有冇威力都係睇人啫。安歷卡？未夠班！
高洛文