由本地人造美女Lydia企出嚟，話自己周身都整過嗰一刻開始，全城又再掀起一股整容風，打針谷胸、隆鼻個個都想試，估唔到連車界都受這股潮風感染話要整埋一份，一向以青春活力形象示人的Mazda3就乘勢推出全新整容版，人家係咁意整對眼做個鼻，佢就大執仲順便谷埋副偈，咁大工程，同Lydia有得揮喎！
記者：黃婉冰
Model：Bonny
外形最大改進係車頭，包括鬼面罩、泵把、軚軨、頭尾燈及霧燈等，改完後成架車更醒神靚仔，車款雖僅相隔一年，但感覺上真係潮氣得多！
外形密改換晒車燈
今次Mazda3可以話係食正個整容風潮，Facelifted版（整容版）都算出得合時，人家隆胸、整眼、隆鼻，佢都唔執輸，一於有樣學樣執靚個樣，打「頭陣」有頭燈、尾燈大換裝，換上「鳳眼」式頭燈、LED煞車燈後，新Look搶眼又Sharp，再嚟換埋個兩間式鬼面罩、長形大霧燈、頭泵把，感覺清簡得來比以前更Young。執完個殼，輪到「內在美」，新車內櫳沿用真皮座椅，但今次就有黑、米兩色供選擇，另外，以前嘅blackpiano內飾現改為木紋，錶板亦由黑變白，呢度改啲，嗰度執啲，整完成個樣唔同晒！
谷大副偈轉向爽快
靠個樣始終唔夠，無「食」力人家未必會吼你，所以新Mazda3索性嚟多個「Retune」內科手術，搵工程師幫手將副偈同傳動系統tune一tune，經過一輪改造後，新車加入油門控制同引擎裝置SequentialValveTiming（S-VT），電腦可以根據引擎轉數、入風量嚟控制活瓣開合時間，從而減低耗油量同廢氣排放量，一句講晒，新車扭力在處於低轉時較以前強，懸掛系統調校過後，高速入彎比以前爽快，唔會出現轉向不足的情形，加上車架做過加固手術，家陣可以放心見彎劈彎，果然有「偈」。
隔音更強駁埋iPod轟機
係，我都知，車廂可以接駁iPod唔係今時今日先有嘅配套，但亦唔係架架新車都有呢個Design，今次更加係萬事得全線車系第一架有呢個配套，而且新車特別將引擎同車廂之間隔設備加強，再重組埋車胎內部結構、強化埋胎軨硬度同加強後懸掛吸震，一輪改造，都係為咗令車廂隔音可以更強，再駁埋部靚聲iPod轟機，一路開車一路開P都得。
Mazda3Specifications
引擎：1,498cc直4DOHC
馬力：114ps/6,000rpm
扭力：14.3kgm/4,5000rpm
傳動：4前速半自動波
車價：待定
車輛提供：萬事得汽車（28931112）