美股步入感恩節假期，日股休假，港股開大開細，當然係好友話事，過幾日就係期指結算，前日個市挾咗上嚟，昨日續炒上。
恒指最高去到19404，輕微突破咗呢個短線阻力位，班好友大戶都好識做，去到嗰個位就回，畀個「受阻」嘅印象大家，收市只係升得14點，好似見頂咁個款，不過，如果仔細分析個圖，就會發現一啲漏洞。19400關同埋保歷加通道頂喺同一水平，亦都畀人一種諗法，嗰個位阻力唔細，之不過通道頂條線正開始屈上去，係好嘅兆頭，好友下一次上試19400，相信破關唔會有太大難度。
大藍籌雖然好多都高開低收，但向好嘅技術走勢其實冇變，淡友主要係壓住滙控（005），股價昨日俾人㩒低0.3%，條10日線壓緊落嚟，壓力加重咗，但係短線嘅支持位喺50日線，條線好近，支持力好強，不過，最重要嘅係淨係㩒住隻滙控只能夠方便吓轉倉，但係就唔可以阻個市升上去。不過呢幾日升得多嘅大藍籌可能會整固吓，資金或者會更加集中炒國企股。
國壽C輪2178：國壽（2628）昨收19.02元，幅圖好靚，成交續增，國內銀行股有唞氣嘅迹象，國壽應可接力做人氣股，有消息話國壽想買徽商銀行10%股權，仲話好快會成事，個勢咁強，破20元推向23元應該冇問題。
C輪2178昨收2.10元，槓桿率9.1倍（有效6.1倍），對沖值0.67，正股升上20元，2178應該會喺2.70元樓上，正股推上23元，2178應該會升破5.20元，如果唔貪心，睇21元，隻輪都值3.50元，呢個價買番啲，正股跌穿18.50元止蝕。
俊 樺