全球資產值最大嘅滙控集團，雖然註冊地一早搬咗去英國，但發迹地始終根植香港，呢度永遠都係獅子行嘅福地，本星期，滙控全體董事連同太太團，一行達四十人，便雲集香港總行，出席今日舉行嘅董事局會議。話時話，今次係集團自98年後，再度在港召開嘅董事會會議，當年困擾全港市民嘅金融風暴同樓市風潮，早已煙消雲散，太太團自然亦心情靚靚，一邊出動探訪做義工，一邊遊維港逛赤柱。
華華側聞，隨行嘅太太團約20人，滙控主席葛霖、行政總裁紀勤、財務董事范智廉等高層嘅太座，都陪同夫婿來港，佢哋既然做得集團高層最強力嘅後盾，當然唔會忘記代表獅子行行善積德。聽講太太團便先後到過牛池灣嘅紅十字會學校，同埋九龍區扶幼會嘅中文讀寫障礙中心，以及港島藝術中心，進行親善訪問。
鄧蓮如乘夜抵港
香港係購物天堂，太太團當然不忘掃貨，噚日佢哋就去咗遊客蒲點赤柱shopping，前日則乘船夜遊維港，食飯品茗，其實唔少太座都係香港地頭蟲，基本上都熟透大街小巷。
至於身兼滙控副主席、永遠雍容華貴嘅女男爵鄧蓮如，據講於昨晚乘夜機抵港，唔知趕唔趕得切，出席晚上喺恒生24樓博愛堂，為班董事而設嘅GallaDinner，聽講鄧男爵夫婿、前律政司唐明治，亦在來港名單內。
[email protected]