美國經濟走下坡，令當地嘅地主佬無啖好食，啲樓盤好滯銷，部份建築商同埋有樓賣嘅業主為催谷樓盤，被迫推出各式各樣嘅買樓優惠，反映花旗國嘅樓市似乎唔多掂。
在《MSN討論區》，網民TupperMom話，喺亞利桑那州買新樓，可免費獲得一部42吋嘅等離子電視機，而且一年內都唔使供樓。至於買二手樓，買家亦可獲贈1萬美元（約7.8萬港元）現金、等離子電視機，同埋去夏威夷嘅機票等優惠。
Dadof3dogs講，有啲建築商肯為買家支付4000至6000美元（約3.1萬至4.7萬港元）嘅「產權轉讓費」（包括律師費、樓宇保險費、驗樓費等），同埋提供低過市場利率嘅按揭息率。
住喺加州嘅unexplained話，當地發展商唔收買樓首期，買家仲可以等到2008年先供樓。19bud74講，密歇根州有好多業主劈價求售。當地網友Jeff1974MI亦有同感，佢話睇啱一層標價49萬美元嘅新樓，佢還價43.5萬美元，建築商初時話起碼要45萬美元先肯賣，但到第二日，建築商話44萬美元都肯賣。
不過，Explortainment1提醒樓宇買家，如果發展商肯大幅割價賣樓，千祈唔好落叠，因為樓價可能有大跌嘅危機。