大市噚日又創新高，唔少散戶一路炒一路驚，畢竟「熊來了」嗌咗咁多個月，遲早有一次噏中。晏晝開市十零分鐘，恒指忽然由19404點高位陰啲陰啲跌，3點過後跌定咗一陣，有啲人愈炒愈慌想離場，偏偏呢個時候，好多散戶用緊嘅報價系統忽然失靈，有人即刻上網問發生咩事，有人爆粗大鬧特鬧，當然亦有人嚇到「摸黑」沽貨。
噚日網上留言版好熱鬧，除咗因為好多人俾報價機玩殘之外，亦有唔少揸咗熱門股嘅散戶叫救命，當中包括富士康（2038）苦主。隻股噚日大跌1.35元，收報23.95元，跌幅達5.3%。
美林噚日發表報告，指由於憂慮手機需求減弱令存貨囤積，加上競爭對手威脅日增，因此將富士康評級由「買入」降至「中性」。呢個係隻股噚日大跌嘅主要原因。
喺「Uwants.com討論區」入面，jj4044好火滾：「富士康呢個week發生乜事啊！日日肚瀉，好想爆粗啊，唔見幾千啊。」
大運船提醒佢：「小心有暗湧。」
chrisggg亦好無奈：「恒指升佢又跌；恒指跌佢都係跌。」
marcoleeau11則大鬧證券商發表嘅報告引致市場出現恐慌性拋售。佢話噚日收市前15至30分鐘，隻股買盤好勁，佢懷疑係壓價收貨。
年半升咗4倍
富士康幾個月前藉住染藍消息大炒特炒，今個月頭最高升至27.70元，上星期以雙頂回落，跌足5個交易日。隻股舊年年中只係5蚊左右，短短一年半升咗4倍，到底值唔值呢個價？
根據彭博嘅資料，隻股現價PE已達54.56倍，預期PE亦有29.68倍，一啲都唔平。
技術上，日線圖已經跌穿上升軌，短期會考驗22元支持，一旦跌穿，要去到20蚊至會有較大支持，短期阻力位26蚊，見有反彈宜沽貨。
余 文