立法會兩個panel噚日下晝開會傾8號仔單刁，一如所料，完全係浪費人力物力！之不過都有啲爆笑位。好似湯家驊話：「如果與會嘅政府代表乜都唔答，我哋開會做乜？」財經事務委員會主席陳鑑林好坦白回應：「係呀！我都唔知。」代表證監出嚟受靶嘅何賢通，俾人片多幾句，就話：「我哋法規執行部會義無反顧去執行。」唔知仲以為證監會撈埋反黑！
先排俾人揼完嘅何俊仁繼續勇者無懼，佢話番薯個財團好簡單，就係一個局，成班人傾好晒，點睇都係關連人士。至於話李嘉誠用基金會入股，佢話check過基金會個董事組合，有五個係李家嘅人，即係超人、大少、二少、超人舅仔莊學山同埋周凱旋……嗱，個point已經唔係關連人士，而係首次有人幫周小姐咁樣確認身份，何議員真係冇得頂！