成龍愛子房祖名和準新郎李克勤近期不約而同購入新車，克勤一擲約160萬買波子四驅車，與未來老婆盧淑儀齊當車主；祖名更加識玩，每年換車及靚車牌，兼且一次比一次豪，前日祖名便出動車價約240萬的S600L超豪平治，載的骰女伴遊車河。
成龍風流成性，其愛兒房祖名也相當愛玩，年年換車，愈換愈豪。前日祖名又出動新落地的240萬豪華平治靚車，載同兩位女伴遊中環。
下月踏入24歲的祖名，對玩靚車牌情有獨鍾，前年他以無字頭「727」車牌配約值32萬的三菱跑車代步，去年則以砌成卡通面譜的「XX101」車牌配車價約43萬的三菱Evolution戰車，近日更上一層樓，年紀輕輕的他駕駛價值約240萬元的S600L黑色平治房車，絕配無字頭「3232」、寓意「生意、生意」的靚車牌，難怪早前成龍會豪花150萬競投與兒子12月3日生日日期相同的「123」靚冧巴車牌。
前日傍晚現身中環的祖名當然要晒靚車，現場見他偕兩名女伴漫步皇后大道中，其中一名年紀較長，另一名長髮的骰女則隨後，他們不時有講有笑，表現熟絡，其後齊到長江集團中心停車場取回其名貴靚車，親自接載兩女離開。
克勤買160萬波子
除了祖名之外，下周二結婚的準新郎李克勤也於月前購置新車，前日他便親自駕駛市值約160萬的黑色保時捷四驅車到順利邨球場踢波。
克勤向來事事體貼未婚妻盧淑儀，所以買新車也少不了她的份兒。據車輛登記資料顯示，該車以克勤和盧淑儀聯名的CosmosCrownLtd公司名義購入，可見克勤確是廿四孝老公。
採訪、攝影：娛樂突發組
