時近歲晚搵麥玲玲，電話另一邊問道：「係咪問07運程？」答案只係想同師傅食餐飯！佢講明淨食飯，因為試過一餐飯要睇20個相無時停，結果我哋去咗灣仔名人朝聖地《車氏粵菜軒》食點心，能成為佢哋嘅飯堂當然內裏大有玄機啦！
記者：朱崇德
攝影：譚盈傑
城中名人飲茶勝地
飲茶食點心，一般人都係「晨咁早」嘅節目；但對於堪輿風水大師麥玲玲，飲茶食點心，竟然係一個晚上活動：「其實並唔係乜嘢時辰、風水問題；一早、一晝基本係我幫人算命睇風水最忙時間，跟本冇可能去飲茶；不過我覺得，晏晝約人飲茶，感覺好鬼亞伯，都係另一大原因！」
《車氏粵菜軒》對好多打工族可能係個陌生名字，不過話畀你知，呢度係城中名人、紅星飲茶朝聖地，不知者、絕不為罪！「一個星期我大約出一次街食晚飯，中環鏞記同呢度車氏都係我嘅最愛，論食物兩邊做得一樣咁精緻！不過呢度夜晚有點心食，仲係即叫即做，論質素，仲靚過好多酒店㖭！」車氏個「車」，之唔係老闆娘車沅沅個姓囉！由國內南海《車氏》到今日嘅車氏，已經有10多年歷史！
倪匡食過讚蒸魚偉大
不過講到《車氏》招牌菜，都係鮑參翅肚一類老派招牌菜，玲玲話：「記得倪匡叔叔返港，話想食好嘢，我就請佢嚟《車氏》食飯，當時佢極力讚賞呢度嘅蒸魚好靚，仲讚個廚真係好偉大，事後佢仲私下帶好友嚟食㖭！」傾談間！老闆娘車沅沅巡舖撞門而入；一個係風水命理大師，一個係歌手加塔羅牌高手，原來私交甚篤，沅沅劈頭第一句就問來年運程：「好多時撞到好友，都會贈佢兩句，大家開心嘛！」不過有啲環境，會變得非常災難性，「試過出去食飯，撞正朋友生日會，卒之身邊要留吉一個位，俾人排隊贈兩句；由開飯講到食完，足足睇咗近20幾個相，嗰餐飯都真係幾忙！」
巧手點心
（前）鮮蝦餃$29
蝦餃要好食首要蝦肉新鮮，且要即叫即做，餡料包冇話出水，食落亁身有蝦味！
（後）上素餃$23
初食時最搶是西芹、木耳同雲耳的爽脆；細心輕嚼慢慢滲出鮮笋的清香，吃下滿口芳香。
排骨陳村粉$39
陳村粉粉身嫩滑，排骨控制得內有肉汁、外表亁身，應記一功，鮮肉香、豉椒之惹味傳入粉中，加荷葉托底一蒸，入口味覺清新。
懷舊炸春卷$23
「芽菜、冬菇做春卷，好懷舊，但好多師傅都忘記咗點做！」雖則全素，但入口鮮香，外表甘脆而不肥膩，簡單但好食，食嘅就係手工！
酥皮叉燒餐包$23
車氏開張的招牌點心，沅沅話自己最愛食麵包，於是將墨西哥包外形＋菠蘿包脆皮＋叉燒包餡合製而成，包脆而餡汁收緊，餡料濃稠適中，又能食出包皮之脆香；此包一出，沅沅話曾見一啲名酒樓老闆都走嚟食，坊間之後出咗啲抄襲之作。玲玲話：「呢個係我最愛嘅點心，不過外賣會冇咁脆香可口，一定要上嚟食先見真章！」
精選主菜
日本遼參+大鵝掌$130
呢個係麥師傅至愛，頂級日本遼參，以3日時間浸至軟身，再以鮑汁燴至入味；入口唔膠、以大鵝掌伴食，味道夾到震！「有時食唔晒，我最鍾意將汁醬同鵝掌攞返屋企整鮑魚，會好味啲！」
清蒸海青衣$672/24両
呢個就係倪大俠最愛的蒸魚，鮮魚鮮甜，齋葱唔使落薑已非常和味；蒸魚豉油微甜帶黃豆清香，能夠提味而不會蓋過魚肉的鮮香；不過阿廚話最重要是控制蒸的火候，僅僅熟，魚肉先嫩滑。
（前）蒜片牛柳粒$50
（後）日本生番茄片$50
腍軟的牛冧肉配以炒香的蒜片及黑椒，入口輕軟又綿；薄切的番茄是以優貨的日本出品，原身已極甜，想鮮味啲，點些砂糖吊味，味道會更佳。
車氏脆皮雞$280
選雞極講究！只會選用2斤4両的龍崗雞或清遠雞做此菜，除咗貪佢有雞味，更重要係呢個重量，肉肥而不膩、油份適中，炸出嚟嘅雞先可以咁嫩滑。
食飯揀位 咪選門口
中國人食飯多避忌，基本如唔好點7個餸、唔好講衰嘢，相信已成為家教一部份：「以前我跟師傅食飯，唔可以講『食完飯』，只可以講『食飽飯』，而且餸菜擺位都切忌一字平排，好似拜神咁唔吉利！」另外入餐廳食飯，亦切忌坐正門口位，由於會有氣沖住，令人食得唔安樂：「最好選牆角，一啲有穩陣有靠山位；但唔可以同門口平排，要對角面向門口；另外出風位、路口位、冇靠背嘅櫈位，都唔係咁好！如果要同人在餐廳傾談生意或談判一啲事件，都會冇咁易成功！」
睇路搵食
車氏粵菜軒（25281123）
地址：灣仔駱克道54-62號4字樓
座位：約180人
營業時間：11:00am-3:00pm、5:00pm-12:00mn
交通：灣仔地鐵站C出口向金鐘方向行1個街口
人均消費：茶市$120；晚市$220
明日預告
Yumiko同Steven帶大家去旺角西洋菜南街狂掃日本菜呀！