睇《南華早報》（十一月二十日）GaryCheung嘅報道，英國解封嘅絕密文件喺一九六九年已研究香港之一九九七問題，一個跨部會委員會嘅報告認為中國絕無理由放棄香港，一定會喺一九九七年收回，英國須為此準備；當時適值文革高峯期，與中國展開商討，不合時宜，故此委員會建議在一九八○年後非正式地向中國提出九七問題，如有回應，便展開談判。為此，英國不能在香港推行代議制，以免得罪中國。而且英國人預料，香港回歸中國消息宣布後，一定會引起移民潮，以去加拿大、美國為主。英國必須力保香港繁榮，將富裕香港交回中國，免生磨擦。後來麥理浩到香港做港督，就係依足劇本辦事，可憐當年啲官守立法行政兩局議員，全部懵然不知。
如此說來，英國人神機妙算，一切盡在計劃之內，彭定康來香港，只係歷史的意外，馬卓安任佢玩，其實係因為馬卓安有啲內疚（自己當選，犧牲咗肥彭仕途），而且知道肥彭係叻人，識得收放自如，況且大局已定，讓肥彭過吓癮，無傷大雅，更可以等北京勞氣，心涼番一陣。
唔怪得一九八○年左右，英國取消香港人嘅居英權，一啲立法局議員要去倫敦抗議，俾麥理浩鬧到死，後來中英談判展開，鍾士元帶隊去倫敦搵國會議員求助，又俾已退任嘅老麥叫佢哋去jumplake，英國老早按六九年計劃進行，只係鍾士元、鄧蓮如等人由頭俾人呃到尾啫。渣甸（怡和）可能預知風聲，故此一早安排遷冊，結果吃了大虧，賺少一兩千億元（早賣山頂地皮，賣港燈，賣香港電話，俾包玉剛搶購九龍倉而不大力抗拒）。歷史就係咁得意，知道內幕啲人，輸蝕得最慘，不知就裏嘅香港富豪，拼命買地，拼命擴充，反而贏到開巷。英國人點解喺一九六九年就叻到預知未來？無他者，讀多啲中國歷史就會知道中國收回香港，係必定發生之事，英國政治人物有唔少在大學主修歷史㗎，你估SOAS（倫大東方及非洲學院）浪得虛名呀？