兩年前國際米蘭成日和波俾人笑，搞到教練文仙尼被人改個「X」（博彩和波標記）先生嘅花名；今日，大家不妨改口稱佢做「和」先生。點解？計埋禮拜三贏士砵亭1:0，國米連開4場「和」，而今季13場讓球主客和就開8場「和」，長追真和味。現代足球嘅冠軍隊最擅小勝，照咁推論，國米都算榮升「冠軍級」球隊囉。
睇以前祖雲達斯、AC米蘭當旺時，同埋家下英超擂台躉車路士，都成日煲魚生粥，贏波僅熟，國米真係似到十足。至於文仙尼可以咁開心叫「和」先生，首先要多謝阿根廷兵告魯斯同埋基斯普。前日場波之前，告魯斯包辦國米之前4個歐冠盃入波；到佢養傷，就輪到鄉里基斯普發圍，前日一腳射垮士砵亭帶隊波出線。
多得阿根廷射手
講番佢個入波都幾見功架，接應隊友高波單刀埋門，等個波彈兩下地、敵衞追到咁滯至大力勁抽入網。喺電光石火間，仲咁老定攤凍嚟食，呢啲咪係超級射手囉。
除咗要多謝阿根廷兵，文仙尼成日排安全陣，令隊波成績好咗。好似最近佢用韋拉、達葛治仲唔夠，辛尼廸周不時移埋入中路，似防中多過翼衞。3防中咁多屏障，想攻破都難啦。
站喺爭標立場，贏波大過天，懶理贏幾多球。喺文仙尼領軍之下，國米今季成日煲魚生粥，點都好過AC米蘭教練肥安煲「老」火湯，用晒班老鬼但攞唔到好成績。