所謂入鄉隨俗，荷蘭銀行入到大陸開分行，都要搞搞中國藝術，𠱁吓本土顧客。荷蘭銀行喺成都嘅分行噚日開幕，安排咗一場四川藝術表演，唔係變臉咁簡單，而係噴火絕技（圖），唔知嚟捧場嘅四川省委書記張學忠滿唔滿意。荷銀話一向注重同當地社會融合，所以同成都嘅西南財經大學簽定合作協定，話就話希望幫到西南財大嘅教育發展，其實荷銀都想培育本地人才就真。
張學忠話，荷蘭同四川一向交往頻密，兩地去年貿易超過1.6億美元；成都同阿姆斯特丹嘅直航上座率有8成以上，呢個周末起，每周航班會由兩班增至三班，預計明年增至一日一班。所以荷銀喺內地開第四家分行，就揀咗成都，客路針對高收入階層和中小企，經營範圍涉及人民幣及外幣。
新華社圖片