港股前日先升後挫，喺高位出現支陰燭梗係有啲震懾力，偏淡嘅情緒會多番啲，尤其係昨日開市跟㗎仔個市低開，股民嘅態度就更加審慎，個市中間試過好多次好似想炒上去，但係都係證明係假嘅，個個都抱住唔做唔錯嘅心態，成交就梗會縮。
高位成交縮其實唔係好事，個市短期內睇嚟要唞唞，但個市大回嘅機會唔大，原因係期指結算臨近，好友仲有優勢。
不過，結算之後，恒指好可能要試吓啲支持位，整固下再炒，資金仍然會炒國企，不過，部份嘅錢就可能轉去抽新股，跟住嚟嘅時間會有好多招股活動，股民有好多機會，之不過大家抽新股唔好諗住賺梗，跟住排隊上市嘅股票，質素都好參差，唔好以為填張form，做埋孖展就會發。
港交所C輪2280：大市嘅成交縮咗，近期走勢偏強嘅港交所（388）可能會出現回吐，昨日收市報70.45元，成交連續第2日下跌，MACD繼續與股價背馳，下周有機會回試10日線，條線𠵱家喺68.24元，技術上應該守得穩，到個市嘅成交升回500億元樓上，港交所將會回復強勢，吼實啲港交所C輪，等正股回落到10日線水平吸納，會有唔錯嘅值博率。港交所C輪2280昨日收74仙，仲有半年期，溢價9.9%，槓桿率9.5倍（有效5.5倍），對沖值0.57，引伸波幅34.9%，正股升上75元，2280應該破1元，正股見78元，隻輪會喺1.20元樓上，正股回試10日線可買，跌穿66元止蝕。
俊 樺