今年最後一輪新股熱又開始，招金（1818）及建滔積層板（1888）今日招股，中國通信服務（552）則下個禮拜，「㷫烚烚」嘅散戶已經蓄勢待發，磨拳擦掌地準備認購。《Uwants討論區》搞咗個會抽邊隻新股調查，有120位網友踴躍投票。
招金一馬當先，支持率高達59%，成為網友心目中最受歡迎嘅新股；因要提高招股價而押後召開記者會嘅中國通信就排第二名，得到26%嘅網友支持；至於同招金同日招股嘅建滔積層板就排包尾，只有15%。投票結果反映，內地股較受網友垂青。
撐招金嘅網友大隻金話：「梗係買黃金股招金啦，話晒黃金係資金避難所，揀呢隻新股較穩陣嘛。」
而Kickway就睇好建滔積層板，因為佢係建滔化工嘅主要收入來源，相信好賺錢。Microleo話橫掂都只係抽得一手，梗係三隻都認購啦！