獅子行中環總行地下噚日好墟冚，適逢滙控董事會喺本港舉行，總行地面大堂嘅裝修及改建亦完成，於是噚日由集團主席葛霖同亞太區主席鄭海泉，主持揭幕禮。
開幕儀式除咗醒獅採青外，亦有兩位小提琴手演奏，名副其實係fusion。有記者問集團主席葛霖，開幕前有冇搵風水大師睇過，身兼聖公會牧師嘅葛霖笑說不知情，坐喺旁邊嘅公關大員即補充話諮詢過「專家意見」。
獅子行喺倫敦金絲雀碼頭嘅總部大堂，設有一幅用滙豐多年珍貴歷史圖片組成嘅「歷史牆」（historywall），估唔到新設計嘅香港大堂遙相呼應，整咗幅由30部Plasma電視機組成嘅「掌故廊」，將滙豐1865年起屹立香港、當時香江風貌人情，獅子行喺亞太區唔同市場嘅發迹史，同埋歷任大班畫像，每日朝8晚7不停播放，動用嘅影像共370幅，聽聞日後會繼續update影像。