近期有遊戲機熱，一個年輕人買遊戲機排隊排兩日，結果成為首名買家，呢個殊榮你覺得無謂，但遊戲機迷如古巨基分分鐘唔只想攞到手，直頭成身標汗。老人家排隊攞米，你會明白，因為條數易計，企兩、三個鐘有幾餐飯食，用時間投資唯一風險都只係企企吓會暈低，就咁去咗，咁都抵！就咁走咗飯都慳番。
售價3000變1萬
但係排隊買機為乜？冇大折頭冇大禮物，苦苦輪候為再次感受日治時代日本人配給慘況？首批200部係架勢，但係第二批係唔係十年先到先？過兩、三個月熱潮一過，我咪又係大搖大擺入貨！
普通茶餘飯後傾偈講到呢度都會轉題目，但係我想講多句，唔好睇小呢班排隊黨，佢哋機一到手唔係立刻返家打機，而係火速放貨圖利，網上拍賣價要過萬，一部3,000變1萬，水位超過兩倍，邊隻新股認購獲利及得上？摩根士丹利等大行應該立刻加個投資部門專排隊買機。所以200幾人排隊分分鐘個個都係炒家。排隊買機同排隊攞米原來一樣，為餐飯。
反潮流專潑冷水
呢種消費模式喺日本時裝都有相同情況，一條褲日本品牌開價3,000，邊個買？明星？公子？廠家？通通靠邊站，着住嘅全部係學生。你又會話屋企畀錢下一代亂使啦，事實又係生意。一條褲開價3,000必定係限量，學生投資自己擁有最多嘅青春去排隊買一條，因為限量兼多人造勢排隊搶買，結果網上拍賣價立刻炒上，分分鐘炒上4,000，你排到一條立刻可以選擇一：賣出圖利；二：自己着番威威。選一，你精明；選二，都有賺。褲價回落需時，到價錢回到3,000之時，已經係兩、三個月之後，條褲都着得屁股暖暖了。3,000大元賣出冇蝕仲賺着，買樓負資產一班苦主聽到都早知幾百萬買潮服好過。呢班年輕排隊企業家就係咁名牌着完一套又一套，但不用分毫。
排隊企業家得以出現，全賴網上拍賣，潮流雜誌吹噓，加上思想簡單消費者全力配合。我係典型煩人，個個話興話好，我偏偏潑冷水，對上一次我揚言反ipod，一班自以為潮人買入大記憶體MP3機，必定喺未用盡所有記憶體前，將部機棄於一角。我有冇講中，你心知肚明。
欣賞打爆機奇人
今次照辦，我最欣賞美國一個同道，佢同樣跟隊買機然後得手後，一出門口立刻當眾用大鎚將部機打爆，成為全球首個「打爆機」嘅機迷，而且仲將打爆機過程放上YouTube供人欣賞，呢種近乎行為藝術式嘅勇士行為令我大呼過癮，不過個鎚唔應該打落部機度，唔關佢事，應該打落網上高價拍賣嘅人頭上。
一部機唔係限量版唔係特別版，搶甚麼？要快人一步？咁你又會唔會喺e-Bay拍賣快人一步「死」嘅准許證呢？倒不如慢慢歎，享受人生，過多兩個月先同我一齊入貨，喺網上一齊打個你死我活呢？
Textby森美
森美專欄逢星期五刊出
