不少美國畢業生嘅夢想，就係可以到通用電氣、花旗集團、埃克森美孚等大企業打工。不過，喺現實世界，當地超過九成新職位來自中小企。《MSN討論區》內有人暢談喺細公司打工嘅利與弊。
網友ARCHIEtheDRAGON話，大公司嘅管理架構層層重叠，官僚主義好重，細公司就冇呢種毛病。有啲細公司由於營運開支較低，所以畀得起較高人工。不過，細公司嘅工作圈子太細，員工被迫要同啲唔鍾意嘅人合作，有時仲會俾人篤背脊，少啲「辦公室政治」智慧都唔得。此外，細公司因為高層職位好少，所以升職機會亦有限。
福利差冇私隱
o_ncn講，喺細公司做嘢，就好似喺屋企一樣咁舒適，氣氛和諧，員工亦經常見到管理層，可以知道公司嘅新發展。如果有好多職員放假，成間寫字樓亦可能關閉，其他人無形中有多啲時間休息。細公司嘅工作環境亦較民主，每個人都有發言權。不過，細公司嘅退休同埋保險福利較差；喺入面做嘢，好多個人私隱亦會畀人知道，所以唔係咁好。
WayBehindTheCurve就提醒求職者，有啲細公司嘅業務實力好差，一旦接唔到定單，就會向員工開刀，令佢哋無人工加，甚至被炒魷。所以喺搵工前，最好先查明公司嘅經營同埋財政狀況，以免撞板。