今期投資特攻隊之所以揀意甲帕爾馬呢支「海鮮波」，原因好簡單，就係因為對手卡坦尼亞啱啱俾羅馬大炒完，士氣低落兼有主力停賽；至於冷選就揀咗英超雷丁可以恃住勇態，作客富咸坐和望贏！文：賴恩
上輪意甲賽事，最令人意外嘅戰果，肯定係卡坦尼亞作客竟然俾羅馬大炒7:0。講真，以兩隊嘅實力同埋狀態，羅馬贏波可以話係意料中事，但數人哋7粒始終難以置信，話晒卡坦尼亞今季既表現同埋成績，最甘一戰都係輸巴勒莫5球；但大家千祈咪唔記得嗰場波，佢地都入番巴勒莫3球，呢次淨輸7球，打擊都咪話唔大。
卡軍缺馬斯卡拉影響大
其實賽前唔少人認為卡坦尼亞可以爆冷喺羅馬身上偷到雞，攞番1分，就連隊中球員開賽初段都打得好盡，一心諗住做「絆馬索」，結果就因為馬斯卡拉領紅，搞到人仰馬翻，賠了夫人又折兵。呢次迎戰帕爾馬，雖則話有主場之利，但馬斯卡拉坐波監影響都幾大，話晒呢位意大利籍前鋒今季都為球隊入過3球波，係球隊能夠喺季初暫居中游嘅功臣之一。
咁都唔止，就連中場嘅巴亞奧高都仲要喺對羅馬場波末段，兩黃一紅被逐，今場波又係得個「睇」字，冇得落場幫手。卡坦尼亞被人哋大炒恥辱性既7:0之後，球員士氣邊有回復得咁快，而且今次又係對另一匹「馬」，相信球員聽到個「馬」字都一定勾番之前嘅傷痛；何況今場波仲要有兩位主力停賽，要贏波真係談何容易！
講番帕爾馬方面，老實講佢哋嘅情況的確唔係比卡坦尼亞好，而且今場波又有隊中首席射手保丹停賽，攻力削弱不少，而且上場又淨吞利禾奴3蛋。不過，帕爾馬有一樣嘢好，就係夠「神經刀」，周不時俾球迷唔少意外驚喜。好似上個月尾竟然可以3:1擊敗狀態大勇嘅阿特蘭大，今次作客啱啱俾羅馬蹂躪既卡坦尼亞，隨時又可以整場漂亮嘅勝仗，就算唔贏，至少都可以保持不敗。
雷丁冒勇坐和望贏
英超方面，升班馬雷丁連續兩場主場贏完熱刺同埋查爾頓之後，今次作客富咸，相信又係時候再俾球迷驚喜嘞！有睇之前兩場波既球迷，都應該覺得佢哋贏唔係靠運，而係憑真實力將對方擊倒。反而富咸上場波對住後防漏洞百出嘅曼城，竟然以1:3敗走，非常之唔穩定，今場波雷丁可以話坐和望贏！
投資特攻隊金句
所謂「一沉百踩」，卡坦尼亞上輪俾羅馬咁樣蹂躪法，球員乜鬼士氣都冇晒，就算之前成績唔差，但對住「神經刀」帕爾馬真係危危乎！