繼陸氏實業（366）之後，上星期有隻叫威鋮（1002）嘅傳統工業股都去搞越南投資，不過股價就認真麻麻，公布後升咗18%，翌日即跌7%，之後橫行無乜炒味。威鋮公布單交易規模唔細，將組成嘅合營公司總投資兩億美金，約15.6億港元，當上市嘅威鋮佔三分之一，都要5億銀，而威鋮市值不過2.8億元。
股價之所以無反應，相信其中一個問題係，將於越南設立之合資公司，擬投資建造市區、公寓、貿易中心及酒店、車廠、電子廠，和開發如採礦及林業等自然資源業務，咁分散即係未有焦點，叫投資者點相信日後發展前景？
噚日又多一隻染「越」股匯富金融（188），因有報章專欄話佢大股東私人持有越南項目，隻股升44%，但全日成交只得120萬銀，講嚟嘥氣。
近年流行寫Blog，喺財經界，有個現象係有好幾個會計界人士將個人投資心得擺上網，據講有啲近期仲登陸埋正式嘅報紙。
由於會計專業人士始終有番咁上下睇數根底，故此好多會計師實際上都係好醒嘅專業投資者，要發掘優質股票，甚至乎「踢爆」問題公司，完全有能力做到。
事實上，能夠熟悉本港上市公司運作同分析企業財務報表，呢種能力係冒充不來的，有這些專業分析做指路明燈，確是散戶之福。不過，會計師好多時忙到飛起，要每日寫嘢擺上網，久而久之都會心生倦意，呢批專業人士近排亦愈來愈多停寫網誌，其實都幾可惜。
歐陽風