九龍城唔係淨得幾間泰國菜大菜館嘅！嗰日咁啱喺富豪酒店對出嘅巴士站等車，點知突然有一股魚肉焦香直衝入鼻；簡直係天人交戰！老編正喺公司等稿、等相？話得「等」，不如等我食多餐做多份稿啦，一於少理！
斤幾重嘅肥大鱸魚，肚裏面塞滿香草、香料、魚皮表面厚厚抹上一把大粗鹽；一燒！香料香味從內而外逼出、鹽又封住魚肉水份，嫩滑口感，再從外而內滲入鹹香風味！
$35叫了一條「加班」開餐（好抵啫！），咬下一口，鹽香、甘香、魚身Fit到漏油；泰國人老闆睇見我呢個食相，馬上笑問：「我呢種家鄉燒魚，好唔好味呀？」得！要多條外賣當消夜唔該！
記者：朱崇德
泰之選泰國菜館（21277348）
地址：九龍城太子道456-464號地下
