北方人愛吃麵，南方人愛吃飯是一個不變定律，但是在香港土生土長、祖籍廣東的李泳漢、李泳豪竟然話：「我哋食麵多過食飯！」原來因為婆婆遺傳，施明的媽媽是北京人，自小食京菜，後來有了泳漢、泳豪兩子，又經常帶他們食京菜，所以一家人的口味都似足北方人。今次施明一家三口推介心水食府北京樓，全程食麵食餅，真係一粒米都無落肚。
記者：林思樂
攝影：周旭文
幫襯幫足28年
施明自星光行北京樓一開業已經是擁躉，以前做女嗰陣拍戲一賺到錢就去北京樓飲茶，後來有了泳漢、泳豪兩子都成日帶他們去幫襯，泳豪話：「我哋幾歲已經嚟食飯。」施明就話：「錯喇！你哋BB嗰陣我已經抱你哋嚟飲茶。」北京樓更是他們的家族飯堂，每個星期日嘅家庭日都會嚟飲茶，每逢大時大節都喺度慶祝，之前婆婆生日都喺度擺酒，二十多年來一直堅持嚟北京樓。
環境傳統又時尚
最愛北京拉麵
點解咁鍾情北京樓？皆因他們說北京樓的菜式零舍好味，單講主食北京拉麵已經足以令他們長期捧場。北京樓的拉麵煙韌彈牙，師傅話全因麵粉發酵時間、落鹼水和拉麵的過程講究用心，鹼水不可以落得太多，否則就會太硬，落得太少就會變成糊狀，一定要剛剛好才會煙韌。適量鹼水對胃有益，可以中和胃酸，所以食麵可以「養胃」。另外，最重要的當然是拉麵手勢好，北京樓每晚8:30都有拉麵表演，可以睇住師傅點樣將一糰麵粉，經一輪工夫拉7次就變成約120條、足24人份量的麵條，每次都睇到觀眾拍爛手掌。施明一家次次幫襯都會叫拉麵，勁讚呢度整得好食，其他地方食唔到㗎！
齊齊學整拉麵
施明在出面食過好嘢都會返屋企試整，他們一家咁愛呢度嘅拉麵，一於齊齊學拉，不過似乎係玩多過學！
北京炒拉麵$75
京菜的風頭雖然被北京填鴨蓋過，其實主食拉麵都好多人捧場。拉麵煙韌彈牙，炒得不油膩，又不會漿埋一嚿，令人忍不住夾完一碗又一碗。
能人居叉子燒餅$20/2條（前）
田家榨菜炒肉$88（後）
叉子燒餅是北京傳統小吃，多配以外省菜一齊食。將麵粉和芝麻拌勻再烤至金黃色，香脆鬆化，芝麻味香濃。別以為榨菜炒肉會好濃味好鹹，其實味道剛剛好，釀入叉子燒餅後不會搶走彼此味道，真是絕配。
烤北京填鴨$320/隻
北京樓選用來自東北三省品種嘅肥鴨，重七至八磅，太輕嘅話皮下脂肪不夠；太重又好肥膩。師傅用醋精和糖膠醃製令鴨皮香脆，然後風亁掛爐8小時後再烤45分鐘。一隻鴨可片出24片鴨皮，鴨肉嫩滑又唔羶，配以夾餅、葱、瓜、醬料食一流，而泳豪好鍾意食葱，施明話：「你咁鍾意食葱證明你的口味似足北京人。」
黃土地炒和尚戴帽$82
泳漢和泳豪喜歡叫這個菜做「和尚戴帽」。煎蛋帽下有芽菜、粉絲、菜絲、青椒、冬笋、甘笋、雲耳、冬菇及豬肉，全部切絲炒至爽脆，配以叉子燒餅或用生菜包食亦可，啖啖菜又健康。
北京糟溜魚片$180
施明一向不喜歡食魚，唯一會食這加拿大鱸魚片，因為魚片夠滑溜，吃下去有淡淡清甜米酒味，她說：「我試過自己喺屋企煮，但始終煮不出那神髓，惟有嚟畀錢幫襯。」師傅話最大蹺妙在於酒糟！佢哋直接由紹興酒廠入貨，酒糟粉零舍純，再用秘方加工發酵。
睇路搵食
北京樓（27358211）
地址：尖沙嘴星光行3樓
營業時間：星期一至日11:30am-3pm、5:30pm-11:30pm
座位：約500個
交通：尖沙嘴地鐵站E出口，向天星碼頭方向行，或乘坐以天星碼頭為總站的巴士。
明日預告
梁繼璋、梁思浩同貴花田帶大家去食壽司，仲嚟個整壽司比賽，睇吓邊個會贏？