居屋售價一直只聞樓梯響，終於喺上星期揭盅，最貴牛池灣嘉峰臺要賣成190萬，平均呎價都要2000蚊，升斗小市民都咪話供得唔辛苦。
居屋重售咁大件事，唔少網友都喺各個討論區度發表意見，好似何偉濤咁，第二日即刻喺《香港地產城討論區》發貼痛斥好貴：「居屋王根本係一個SICKJOKE......係，個景好靚，不過你要用錢時，賣唔到樓就死，但居屋王太貴好難賣......」佢仲覺得買居屋遲早輸錢咁話喎：「銀行都當係高風險物業，今年特別多大過5年樓齡嘅居屋銀主盤以20-25%折讓（已補地價）出貨......銀行都唔睇好。」聽佢咁激嘅口脗，唔知係咪曾經俾居屋累得好慘呢？
另一網友commuter亦都唔睇好居屋，尤其係天水圍嗰啲：「老實講，如果銀根鬆動，更加唔好揀天水圍嘅居屋，第時好難賣，賣到個價又未必好......唔好同我講屋係攞嚟住，我都知，不過我亦都知無人會拍心口話呢世都唔換屋......」佢仲送兩個字畀買天水圍居屋嘅人─「棧搞」。
橋唔怕舊最緊要受
有位《香港討論區》網友chinahk30見個個都彈多過讚，就醒條好橋畀政府，等啲人唔嫌貴不特止，仲會爭相入貨㖭：「改個豪啲嘅名，嘉峰臺改名做嘉峰豪苑，愉翠苑改名做御翠皇庭，天富苑改名做富薈軒，全屋外牆用納米技術消毒，再將最頂層單位二合一改做大單位，mark高三成呎價，咁樓下細單位就變相好似賣得好平咯......」哈哈，睇嚟呢位仁兄對賣樓都幾有心得，話唔定地產商遲啲會搵佢幫手，谷吓銷量噃。