大市再升，淡友只係開心咗一日，噚日又被挾爆。有網友不禁問：「明天你是否依然挾我？」唔知係攞景定贈興！另一個網友送上7字咒語：「每天挾你多一些。」
個市升到咁，就算唔順勢造好，都唔好亂咁學人造淡，唔覺意中咗7字咒語，就喊都無謂。如果唔想高追強勢股，惟有向一啲尚在整固嘅股份埋手，噚日網上就有人叫大家留意晨訊科技（2000）。隻股噚日收3.41元，升5仙。
喺《香港討論區》內，網友haisheng噚日朝早出post：「2000待開車……原本定3.6止賺，現在視之為阻力位，上望$4。」
kazuyasawaki都睇好隻股，可惜佢已經落咗車：「睇報紙12月4日-8日3G有發表會，必爆。不過我喺早排3.45放了。」
巴治奧亦係捧場客：「我上星期五$3.45入咗20K，𠵱家升返$3.45，我都睇$4.00左右。」
另一捧場客warlan話：「早排$3.7入，坐完艇，睇$5.0。」
humblo對呢隻股好有期望：「終於識浮番上嚟，爆多幾鑊就正。」
colorsix夠晒進取：「今日再追過。」
晨訊係內地移動手機及無線通訊模塊開發商同埋液晶顯示模塊製造商，根據內地報道，國家支持TD-SCDMA嘅決心非常明確，TD相關設備開發商如晨訊相信會受惠。內地消息話，3G喺多個省分測試成功，市場預期3G發牌時間漸近，令一眾電訊設備股早排顯著炒上，其中中興通訊（763）同京信（2342）跑得最快，晨訊相對落後。
3G概念有得炒
近排中資股凡有概念嘅股份都舞到天咁高，內地3G既然好事近，相信相關股份回一回氣又會嚟過。睇張圖，晨訊今年5月見過4.65元高位後急跌，10月跌至最低2.47元，之後雙底反彈，上星期以大陽燭加大成交撐闊保歷加通道，最高見3.51元，MACD亦由熊牛轉為雙牛訊號，呢幾日正處旗形整固，成交大減係好現象，一旦整固完，起碼睇4蚊，短炒以跌穿$3.2止蝕。
余文