周二歐冠盃E組賽事，西甲球會皇家馬德里始終破唔到宿命，完場前雲佬12碼又宴客，主場只可迫和法甲勁旅里昂2:2，但一樣穩保次席出線，而後者當然首名晉級啦；但完場前發生嘅小騷動，皇馬一向愛搞事嘅卡斯辛奴竟無份參與，求大俠睇見仲以為自己發夢呀！
魯爾馬隆達始作俑者
呢段小插曲發生喺完場前數分鐘，主角係皇馬前鋒魯爾同對方入球功臣馬隆達（最終兩人均被罰黃牌），更導致雙方球員差啲開拖，但當雙方球員一窩蜂擠作一團，好似卡維兇相撩交打、簡拿華路笑笑口走去勸交之時，後備入替嘅「壞孩子」卡斯辛奴，竟然靜靜咁企喺遠處隔岸觀火，真係唔知佢係被貶去預備組跟操時學乖咗，定係已經對皇馬嘅一切漠不關心呢？
講番場波，唔識留放嘅里昂開賽30分鐘，就憑卡維同馬隆達先後建功，領先兩球；之後皇馬由廸亞拉頭槌同雲佬越位執雞追成平手，完場前1分鐘，皇馬獲得12碼，大家都以為佢哋可以打破近3次交手不勝嘅劣績，但雲佬就老實不客氣咁宴客。
儘管如此，今季離開曼聯嘅雲佬喺歐冠盃已有4球進賬，而另一邊廂嘅曼聯前鋒沙夏亦12碼「炒粉」兼單刀失機，間接令球隊痛失3分，未知費格遜點諗呢？
「卡斯辛奴唔參與爭執確係值得讚，但係作為隊友，唔鍾意都過去扮吓勸交啦，唔係盞俾人話你唔團結，求大俠又塞錢落你袋呀，聽到冇？」