淡友又中伏，個市呢幾日回咗啲，畀咗啲淡友好大憧憬，但係憧憬同夢想好多時好難分得清楚，掌握大局嘅大戶好友一施回馬槍，恒指就挾高咗242點，大家應該好清楚，喺𠵱家嘅市況，造淡其實有好大風險。前晚美股變化唔大，昨日㗎仔個市造好，但係好似俾港股帶上去，而唔係刺激港股造好，有一樣嘢大家要留意，就係前晚美國出咗經濟數據之後，美股嗰邊又好似想炒番出年1月減息，前晚美股有好濃厚嘅假日氣氛，昨晚會唔會炒一轉賀吓感恩節，好快就知道，不過，港股挾咗上嚟呢個位，睇怕喺下個禮拜三結算前，淡友都會處喺挨打嘅狀態。
昨日個市氣氛好好，滙控（005）同中移動（941）都升咗，但仲未大力抽高，不過睇嚟好快會開車，地產股就好強勢，加埋重磅股中海油（883）同建行（939）顯著上升，港股上升已是勢不可擋。昨日交行（3328）升咗4.1%，報收7.36元，但係隻C輪9099就只係升咗17.5%，啲盤擺明㩒價收貨，9099起碼升少咗7個仙，交行今日應該會上試7.56元，睇嚟9099可以升番凸。
中石化C輪4455：中石化（386）昨日報收6.32元，升咗5.3%，買盤好積極，係咁掃，唔似短炒賺幾格咁簡單，睇番入恒指成份股嘅時間表，下個禮拜有機會升到7元。
隻C輪4455昨收72仙，槓桿8.8倍（有效6倍），對沖值0.68，引伸波幅28.4%，料會回升，加強輪價之升勢，正股升上7元，4455應該喺1.2元樓上，就算正股見6.8元，隻C輪都唔會低過1.05元，呢個價買，正股跌穿6.1元止蝕。
俊樺