前晚德乙上演「非一般」榜首大戰，卡爾斯魯厄迎戰羅斯托克爆咗個4:4「和其他」波膽出嚟，賠率冷到成200倍。睇番卡爾斯魯厄半場已經領先3球，全場竟然俾對手迫和，德乙上季咁多假波疑雲，呢場波假唔假真係佢哋自己先知。
球迷唔值再博大霧
雖然今季日職同意甲嗰邊，都試過有落後3球之下被追和，甚至反勝嘅例子。好似烏甸尼斯作客賽和森多利亞3:3，又係領先3球下甩鬚；川崎前鋒作客FC東京領先4:1，完場俾主隊反勝5:4。不過求大俠喺度奉勸波友，「和其他」波膽真係幾季都開唔到1次，呢啲嘢可一不可再，都係唔好成日博大霧。
講番卡爾斯魯厄對羅斯托克，求大俠覺得呢場波又假唔晒，話晒兩隊攻力都有番咁上下，加上又係榜首大戰，鬥志嘅嘢真係話唔埋。不過求大俠都有上網昅過吓啲討論區，發現好多波友都認為呢場波「假到爆」。
有網友就話兩隊賽前已經夾定和波，齊齊拍住上升班上德甲；另一位就話德乙不嬲好少正路波，好明顯成日出現假嘅賽果。有啲網友仲好識講笑，話場波一啲都唔假，因為未踢成5:5喎。
「其實德乙傳打假波都唔係今日嘅事，如果當日有大把賽事選擇投注，咪唔好掂德乙囉；如果得一、兩場賭，細細哋玩吓都無妨嘅。」