今日大市又再創新高，H股指數走勢尤勁，升咗284點，向着9000點進發，市場情緒氣氛高漲。喺呢個充滿賺錢機會嘅大牛市，有網友喺《現金流投資論壇》搞咗個入市統計率嘅調查，問吓網友𠵱家用咗手頭幾多資金入市。由於唔少人都會炒吓即日鮮，所以就以收市為準。
投票結果得出，大約40%網友用咗八成錢去炒股，當中一半更高達九成，投資策略非常進取；另有11%網友就用七成錢入市；有40%網友就較為穩陣，只係動用咗一半資金買股，算係一貫保守嘅投資者態度。呢個簡單嘅投票調查顯示，愈來愈多投資者積極入市，趁呢輪市旺去賺錢。
和黃都升牛市近尾聲？
用咗九成錢入市嘅網友LoveBoBo話，自己咁樣投資都會有啲騰，驚個市隨時會冧喎；Crazyjan就形容𠵱家嘅心情係一步一驚心，但又引人入勝。真係典型賭仔心態！menwhodreamed話自己嘅情況係置諸死地而後生，唔知咁又算唔算係「一將功成萬骨枯」呢？亦有網友話自己一啲都唔驚，因為長線投資嘛。
順帶講講，今日李超人嘅長和系都錄得唔錯升幅，特別係吽咗好耐嘅和黃（013），升咗近4%。喺《香港討論區》內，網友股估怪怪就話：「和黃發火，非同小可！隻9077call輪，一日升626%！」但Toyota2006就擔心，連佢都升，唔知係咪即係表示大市快見頂？
現時個市仍然牛氣沖天，相信短期內只會大漲小回。不過，最好存有戒心，千萬唔好將所有雞蛋放晒喺一個籮裏面，提防當市況逆轉時會得不償失。