被控騙取綜援嘅慈母，含辛茹苦，養大五名子女，長女做咗會計師，次子成為會考尖子讀緊大學會計系，其故事相當令人感動，法官輕判之，相信人人贊成，畢竟佢「騙取」之綜援數目微不足道，而且冇刻意布下騙局嚟呃錢，不同一啲人在陸羽出入，居然亦涉及騙取綜援也。
家貧並唔係一定出唔到叻仔叻女嘅，呢件案件主角就係好證明，反之，唔使攞綜援，湊女放學要搭火車頭等嘅，家境應該唔係太曳吖嘛？呢晚左丁山坐火車，頭等內擠滿人，到咗旺角，好多人湧入嚟，有啲女士話：「坐頭等都冇位坐嘅！」有不平之意，女士誤會嘞，喺尖東上車搭頭等，就一定有位坐，在其他站上車，講運咯。一位女士拖住一個小學女生（穿着校服），衝入嚟行得快，搵到一個位，自己坐低，女兒站立。
呢位女士一坐好就鬧個女，「冇用」、「白癡」、「黐線」等詞脫口而出，聽到左丁山眼眨眨。呢位小女孩樣子活潑可愛，口齒伶俐，猛咁講好說話請阿媽畀四十蚊報名費參加學校活動（聖經朗誦），畀二百蚊買冬季校褸，老實講，左丁山都好少聽到小學生咁識講嘢嘅。但呢位阿媽面色難睇，一味話：「有排先至講」，「太貴」，「人哋買，你唔好買……」總之冇句好說話。
時時有人講香港教育唔得，學生態度不佳。睇見呢位阿媽要坐頭等火車，自己坐，阿女企，言詞面色令人心寒，點教女呀！教育並不是純係學校老師之事，家教好重要。兩人坐一次頭等返新界（左丁山在馬場站落車，佢哋繼續去），車費都接近四十蚊啦，點解畀四十蚊個女參加學校聖經朗誦活動都要推三推四？冬季校褸唔使買咩，天氣轉寒之時點算？到時咪又要買，何不和顏悅色應承個女，振奮女兒士氣呢？
中國傳統教育講求身教，家長、老師行為以身作則，在公眾地方鬧女兒「白癡」，日積月累，唔知對小孩子心理有乜影響。左丁山敢大膽預測，如果呢位小女孩成績差，呢位阿媽一定大罵老師冇用，女兒冇腦！