8號仔賣盤搞咗近半年，梁伯韜同小小超李澤楷呢排仲隔空玩男子單打，要證明自己係清白之軀，又有人話唔like個夢幻買家組合（尤其係有家長介入），寧願賣唔成云云。點都好啦，𠵱家單刁進入大直路，「呢一秒鐘」，普羅大眾其實已經當《家變》咁追，但中外傳媒嘅焦點，就移晒響曾蔭權為首、以強政勵治為強項嘅特區政府度，睇睇究竟有冇官商勾結，點解各相關部門會開晒綠燈畀超人＋誠實小番薯再crossover網通，一齊買8號仔，而以馬時亨話事嘅財金監管部門同證監就最大鑊，因為市場仍然有人質詢，點解佢哋裁定呢個組合唔係一致行動人士？
但大家嘈還嘈，馬仔呢位前8號仔高層，除咗好似播帶咁重複話關注之外，似乎唔打算介入，好似今日立法會兩個委員會開會討論呢單世紀大刁，馬仔都只係派出首席助理秘書長等第2、3梯隊去sit會畀班議員片，唔知佢係唔敢得罪二少呢位前度老闆，抑或真係忙成咁？
再者，賣方嘅二少講明唔去，好睇得起番薯梁嘅超人亦唔見得會放低身段，去同班公務員解話，所以，環保團體應該去門口示威──因為成個下晝開晒燈同冷氣響度齋吹水，真係好嘥電、唔環保！
二少人氣再攀升
講番二少呢個年度型男，繼噚日俾傳媒指名道姓，爆話佢唔滿意見到阿爹係買家兼夾希望賣唔成之後，身為賣家嘅二少人氣再次升到另一高點，噚晚出席一個頒獎禮晚宴，自然俾人追問到底有冇呢個星語心願？當然，答案係正常過正常：「今日唔講嘢……適當時候會有公布。」但華華可以「發誓」，「究竟你係咪唔想賣？」呢個問題，二少至少俾人追問到30號揭盅為止囉！
[email protected]