由國際電訊聯盟（ITU）主辦、被喻為電訊界奧林匹克盛事嘅2006年世界電訊展，下個月初就喺香港機場亞洲國際博覽館舉行，聽講贊助商之一嘅寶馬車廠，會借出200多架新型號寶馬，供出席嘅外國政要及參與者使用。
佢哋又率先搞搞新意思，喺呢個星期五，首先於金鐘港麗酒店邀請傳媒午宴，然後派出旗下寶馬靚車車隊，接載記者由金鐘駛往機場，出席記者會，等傳媒感受一吓寶馬嘅性能同威力。
其實寶馬派出車隊贊助大型活動，早有前科，去年底喺香港舉行嘅世貿第6次部長級會議，寶馬亦曾派出280輛7系轎車，接載出席會議嘅各國政要，會議完畢後，寶馬又以86折價格，出售轎車，交投都非常熱烈。
講番個世界電訊展，政府預期參加人數會高達6萬人，係香港開埠以來最大型展覽之一，除咗國際電訊界巨頭外，各國部長政要，祖國亦會派出副總理級領導人出席，大會已邀請特首曾蔭權，以及今屆諾貝爾和平獎得主尤納斯教授，出任主禮嘉賓。