任天堂Wii一改遊戲機華麗畫面發展方向，專注體感遊戲，以揮動棒狀手掣控制，令操控方法更易上手。任天堂話Wii可以開拓全民玩Game；事實上係咪真係可以吸引到女仔呢？就嚟一個少女玩Wii測試！
文：吳系之達
攝影：伍慶泉
模特兒：Geneieve、嘉琪
鳴謝及售賣點：DreamStore（25753285）
功能大測試
雖然Wii正式推出前已經發放咗好多官方資料，不過仍然有好多疑團仍未解開，趁住實物到港，即刻嚟個功能大測試。
測試一：1m以內唔可以控操
官方話1m至3m內效果最好，不過香港居住環境淺窄，擺部機入房玩就未必可以有咁多空間，所以就要試吓響1m範圍內接收有無問題。
答案：唔可以，在1m之內就完全無反應，所以咪使旨意玩射擊Game可以出術走近啲射。
測試二：唔可以播CD、VCD及DVD
官方講明播唔到，要等07年後半年先至支援，不過姑且一試睇吓有無奇迹。
答案：無奇迹，無隻播得到，想睇碟聽歌就等出年。
測試三：玩唔到模擬器Rom檔案
唔係鼓吹老翻，只係求真，以載有紅白機及N64遊戲嘅SD卡及CD光碟放入Wii。
答案：完全讀唔到，玩唔到老翻Rom。
測試四：只讀到JPEG
官方話讀JPEG無問題，其他就無講，即管試一試。
答案：的確只有JPEG讀得到，其餘一律讀唔到。
測試五：用唔用到讀卡機
既然Wii有USB，咁就插個讀卡機入去，睇吓支唔支援。
答案：無反應，所以除咗SD卡之外，其他卡都睇怕用唔着。
測試六：對應個別NDS遊戲
官方話可以對應，但無講用邊種方式對應，即管試吓齋機有無得對應。
答案：無反應，應該係個別Game先可以對應。
少女打機大評審
任天堂強調擴大「Game人口」，要唔玩Game嘅人都加入埋玩Game行列，唔係空口講白話，首先NDS以簡易輕觸屏幕方式操作，成功開拓女性市場，嘩！真係唔到你唔服。今次Wii以同一概念出戰，到底能唔能夠可以好似NDS咁成功呢？不如就做個少女試玩Wii測試，將成個試玩呈現畀你睇。
Wii售價：$3,550（連《WiiSport》及《薩爾達傳說》）
試玩遊戲
《WiiSport》
專為發揮Wii而推出，有網球、棒球、保齡球、高爾夫球同拳擊五款遊戲，每隻都以揮動操控棒操控角色動作，好似真係做緊運動咁。
《薩爾達傳說》
角色扮演遊戲系列，操控主角到處冒險，與各種怪獸戰鬥，及解開謎題，同樣以揮動操控棒嚟操控。
嘉琪：揮棒好過癮
嘉琪之前好少玩遊戲機，原因係覺得操控太困難，平日返學做功課已經夠煩，打機係想輕鬆，要記住一大堆操作指令就只會令自己煩上加煩。嘉琪表示：「《WiiSport》嘅操作好簡單，根本唔需要記指令，隨自己意思去揮支操控棒就可以，而且感應動作比想像中好，幾準確細緻。不過《薩爾達傳說》原來一樣要按好多按鈕先可以做到各種動作，唔啱我玩。」
Geneieve：唔明有乜好玩
Geneieve平時唔打機，亦唔明遊戲機有乜好玩，所以佢應該係Wii要攻佔市場最大障礙，Geneieve試玩之後表示：「開頭玩頭一分兩分鐘都覺得幾新奇，不過之後就好似無乜特別，而且揮空棒感覺好奇怪，唔係好慣。玩《WiiSport》網球遊戲還可以，不過玩保齡球就無保齡球嘅重量，玩起上嚟完全唔係嗰回事，至於《薩爾達傳說》就唔使預我。」
測試結論：角色扮演遊戲未夠好
測試中，發覺Wii雖然未至於有能力征服每一個少女，起碼Geneieve仍然攻不破，但整體嚟講，由於操控簡易，的確吸引到一班唔係打開遊戲機嘅女仔去玩，至於一向打開機嘅機迷，平時追慣畫質，Wii嘅機能所限，所以只淪為次選，情況就同NDS好類似，有得亦有失，但整體係得多於失，亦算係一件成功嘅產品。
玩Wii要空間
玩Wii需要一定空間，全世界都面對緊環境擠迫問題，唔係人人都可以有足夠嘅空間嚟玩Wii。而三部次世代機當中，最遲推出係Wii，但反而機能佢最弱，家陣個個講緊高清，PS3同XBox360都支援高清，Wii明顯落後於人。
不過有危機唔一定代表會輸，正如NDS銷售量大勝PSP亦令人大跌眼鏡，次世代機場仗𠵱家先開始打，最後誰勝誰負仍要放長雙眼去睇。
永不熄機保持連線接訊息
任天堂Wii，除體感操控外，另一個賣點係兼容舊款遊戲，除咗兼容GameCube遊戲光碟外，玩家可以響網上付款購買舊有嘅紅白機、超級任天堂、N64、SEGAMegaDrive、PCEngine及MSX遊戲。Wii亦設有多個網上頻道提供各種免費或收費資訊。此外，Wii亦獨有低耗電量永不熄機模式，關閉主電源後仍保持低耗電運作，令主機可以保持網上連線接收訊息或進行需要實時運作嘅遊戲。
