中移動（941）過去半年升到嘭嘭聲，好多人睇到目瞪口呆，但冇乜幾多人夠膽高追。唔少人相信，當市場炒完中移動後，下一目標係炒中電信（728）。咁啱得咁橋，上月頭忽然炒內地3G概念，中電信股價即刻發力，個零禮拜間由3蚊樓下炒上3.78元高位，三兩下手勢升咗接近3成。
升得急回得快，隻股過去3個交易日皆下跌，由高位碌番落低位，最多唔見咗9.3%，噚日收報3.47元，跌1仙。
「香港討論區」入面，股壇艾力神噚日一早上網：「基金大戶不斷增持，使乜驚呀？基於巿場上嘅information係assymetric嘅因素，大戶嘅資訊一定比散戶多。728目標4蚊啦。
窮金蛋認為好啱聽：「對，我都等到4蚊先放。」
hkstockex亦係大好友：「中國電信最後召集，未入嘅好快啲上車，今個禮拜尾，個仔開始招新股（中國通信服務，552），斷估個阿媽都唔會衰得去邊啩……。」
事實上，最近的確有好多機構投資者增持中電信，例如HalbisCapitalManagement喺11月14日增持2470萬股，平均價3.38元，持股量由4.88%升到5.06%；摩通最新持股量6.07%，平均價2.86元；澳洲聯邦銀行近期4次增持，最新持股量9%，平均價2.96元。
機構投資者爭相增持
睇番張圖，隻股上周四以大陽燭爆上3.78元高位後急速回落，暫時喺3.40元邊有支持，短期應有力反攻，但由於跌勢甚急，短期內未必可一舉衝破3.78元阻力，暫時會喺3.50至3.70元之間整固，但若一旦跌穿3.34元，3蚊至有較大支持。
余文