昨日大行老友約睇夜馬，連久違了的大高手亦出現，睇見佢架新「波子」就知佢呢排手風好順，不過佢就猛呻炒股賺嘅係辛苦錢，呢輪炒股炒到幾乎精神分裂，本身明明覺得大市高處不勝寒，但就偏偏迫自己大手掃貨，與內心對着幹。
大高手果然係大高手，聽君一席話勝炒十年股。市癲最好炒，好似近排大市升到你唔信，好多時炒三幾日好過炒一年，問題係你本身唔跟住個市癲，嗰啲𠵱家trade緊07甚至08年預測PE嘅股票，你根本買唔落手，結果唔癲亦唔會贏到大錢。大高手能夠在適當時候Switchoff理智，抵佢發大達。
穩陣難發達
當然大高手能夠發大達，仲有一招係七分癲時三分醒，當大市出現轉勢迹象時，識得Switchon番理智，跳車走人。
趙飛雲就自問無呢份功力，做嘢都係順心而行，覺得大市高處不勝寒就揀啲風險低嘅股票甚至唔做嘢，以及縮細注碼，所以永遠難贏大錢，亦唔會輸清光。
港股經昨日一挾，唔少淡友又壯烈犧牲。其實好多人都知道牛市不應估頂，不應逆勢造淡，但往往又是腦控制不了手，似乎亦是另一類精神分裂。
在股市搵食，看來除了要有百般武藝，既學基本分析，又學技術分析，及搭通天地線之外，更重要是適時而癲，適時而清醒，否則好難贏大錢。
倉內兩股恒地（012）及地鐵（066）昨日亦跟隨大市造好，但就跑輸大市甚多，希望稍後炒落後會輪到。
趙飛雲