谷德昭（肥谷）日前被本報記者發現在灣仔188商場買翻版AV鹹碟，事件引起很大迴響，身為電影工作者的他竟購買翻版碟，他昨日已分別在報紙專欄及記者會認錯。不過同是電影一分子的梁家輝及黃秋生卻力撐肥谷，秋生更公然表示支持翻版碟。
谷德昭昨日與梁家輝、楊愛瑾、方力申、鄭中基和蘇玉華等在土瓜灣出席新片《心想事成》開鏡拜神活動，初時肥谷仍辯稱買翻版鹹碟是為了《心》片其中一場戲，才會到AV店視察整個賣碟過程，但當問他視察完後，為何仍要購買翻版鹹碟時，他迴避說：「如果我係普通人，去買就唔係大件事，我成件事只係去睇個流程。」記者指他可選擇不買，肥谷最終無奈地說：「我明白，我係做咗唔正確行為，影響咗同業係唔啱。」
蘇玉華當面揶揄
肥谷表示他已在昨日的《蘋果日報》副刊專欄以「多謝關心」解答所有問題，其中他寫道：「深切反省之後，明白到就算是為了工作做資料搜集，買翻版也是一項不正確的行為，此舉更會對香港電影工作者的聲名造成損害，謹此向同業深表歉意。」
擔任導演的鄭中基被問到是否為肥谷開脫才臨時加了場與AV店有關的劇情？他說：「唔係，真係有場咁嘅戲，但唔可以透露係乜。」蘇玉華在戲中與肥谷演情侶，有親熱戲份，她笑說：「佢可能去做research，我會慢慢學習同適應。」
「4仔冇正版啩」
另外，梁家輝及黃秋生昨日在尖沙嘴出席「星光大道」打手印儀式時，齊替肥谷說好話。秋生半開玩笑說：「佢做research唔通買正版咩，research費用梗係愈低愈好啦。」接着秋生很認真地說：「每個人嘅價值觀同標準都唔同，我支持翻版，我有我嘅理由。至於點解，唔好講嘞，總之我唔係儍。呢個世界表面有好多規則欺騙普羅大眾，背後有另外嘅故事。」秋生去年曾因電影《頭文字D》及主演的演員被內地商品盜用做廣告宣傳，而在內地出席反侵權新聞發布會，昨日他竟表示支持翻版，認真講一套做一套！
家輝則說：「佢唔係支持老翻，4仔冇正版咋啩，睇4仔一定要睇翻版㗎，唔係咩？我唔知呀。唉！不過圈中人一定唔應該支持翻版，相信佢係冇意嘅。」
採訪：魯萍、何永寧 攝影：陳俊強、林德雄
