美國經濟宗師、諾貝爾經濟學獎得主佛利民上周辭世，各界均感到惋惜。佛老是提倡開放市場和企業私營化的先驅者之一，並以「世上無免費午餐」這名句享譽全球。
在《MSNBC討論區》不少人暢談對佛老的評價。
網友MrEmployment話，佛利民係現代最偉大嘅經濟學家，而且係共產主義瓦解嘅功臣，佢𠵱家與世長辭，自由市場經濟恐怕會倒退。
SCHFORFREEDOM亦大讚佛利民，話如果佛老幾年前坐格林斯潘聯邦儲備局主席個位，美國經濟肯定好好多。
偽學券激死佛老
pleasegetreal就大肆評論佛利民嘅功過。佢話，佛老令到好多發展中國家嘅食水、天然氣同埋天然資源業務被私營化，然後被外資收購；不過，佛老亦導致呢啲國家嘅公共服務減少，工會執笠，而且令利息升到好高，當地人焗住要捱貴息。
Ichthyosaur話啲「左仔」好憎佛利民，雖然共產主義者未能搞好經濟，造成生態災難，而且違反人權，但佢哋當年依然企圖反對佛老獲頒諾貝爾獎。
佛利民早前批評香港為學券制設限，喺《雅虎香港》網站，網民周容發表陰謀論，話特首曾蔭權先令香港放棄「積極不干預」經濟政策，教統局局長李國章又推行「偽學券制」，跟住佛利民就一命嗚呼，係香港政府激死佛老。