美國航空業最近又有喜事，USAirways再次提出「迎娶」達美航空（DeltaAirLines），希望兩間公司合併後，每年可以慳16.5億美元（約128億港元）。撇開商業層面唔講，到底呢項併購，對一般人有咩好處呢？
《華爾街日報》調查顯示，有五成三人贊成呢宗併購，主要因為受訪者買咗呢兩間航空公司嘅股票，又或者買咗USAirways嘅飛行會籍。KTHughes認為，合併可以令兩間積弱嘅公司壯大，不但有利股價，長遠計對員工都有利，因為唔使驚間公司會執笠喎！
至於呢宗併購對乘客有冇着數，《MSNBC討論區》嘅網民多數認為冇乜好處，因為USAirways櫃位同機艙服務好差，經常取消或延誤航班，搞到最近要申請破產保護，而達美出年先擺脫破產保護，但待客服務相對較好；所以雙方如果合併，達美嘅服務質素恐怕會變差。
網友Swing4thFence話，達美航線選擇多，識得控制成本，票價又冇咁貴，如果USAirways唔併購佢，達美就一定會成為強勁嘅競爭對手。至於點解USAirways提出合併後嘅新公司，要用達美個品牌嚟營運，咪就係因為達美嘅知名度高囉！