華華噚日喺建滔積層板嘅上市推介會，見到新股稀客大劉劉鑾雄，佢仲帶埋女友呂麗君出席。大劉同埋彤叔會各自認購1億美元股份。彤叔鍾意投資新股，唔少人知道，佢差唔多係大型國企招股的常客；至於大劉則比較少見。之前大劉透過上市公司華人置業入股海油化學（3983），呢隻股嘅股價由上市至今升咗62%。另外，聽聞大劉舊年都有認購雨潤食品（1068），賺得仲多，股價上市至今已經升咗87%。
講開炒股，前日華華睇聯交所股權變動資料時發現，大劉上周三增持199.6萬股首創置業（2868）股份，每股平均價3.57元，持股量由4.9%升至5.09%。如果唔係呢個資料，大家都唔知道大劉做咗首創嘅股東。噚日首創收3.65元，大劉增持嘅股份都有微利。