陳奕迅因其父陳裘大被判刑，舉止反常又向記者爆粗。「Eason嫂」徐濠縈前晚收四萬元厚禮在中環出席Loewe活動，她直認夫婿心煩暴躁，要煲牛蒡湯、野生花旗參湯為對方下火。徐濠縈又謂不會將老爺被判入獄的事告訴女兒康堤。
西班牙名牌Loewe近期氣勢如虹，前晚在中環香港設計中心舉行新手袋napaaire酒會，由名模樂基兒、AnaR.和Mikki等示範新手袋。陳奕迅（Eason）妻子徐濠縈一身黑色皮裙到場，大方接受訪問。提到老爺陳裘大早前因貪污罪成被判監六年，問她家中情況，她說：「我如常送個女返學，如常工作。」
「我要撐住屋企」
Eason近日心情激動，又爆粗罵記者，徐濠縈直認說：「係呀，佢有啲煩躁，所以我要撐住我屋企，唔會刻意匿埋，我會如常出外。佢自己又躁，又有記者挑釁佢。唉，如果體諒佢，有啲太難聽嘅說話可唔可以唔好問呢？大家高抬貴手啦，我都叫佢要假啲，唔好太認真。我以前都係咁，𠵱家冇乜脾氣，會保持緘默，我諗起個女，見到自己鍾意嘅時裝會開心番。」
徐濠縈又謂經常煲靚湯為Eason下火，她說：「呢排我煲得最多嘅係牛蒡湯同埋野生花旗參湯，我唯一嘅貢獻就係煲湯、湊女同幫佢買演唱會、唱片封套嘅衫。」她又謂暫時不會將老爺入獄之事告訴女兒康堤，她說：「佢得兩歲，等佢問再算啦。」
此外，徐濠縈透露大會將把她全身的新裝及手袋送予她作禮物，共值四萬多元，她說：「我覺得好有面，呢個袋07年1月先有，𠵱家送咗畀我。去呢啲events，我鍾意個牌子，又有嘢攞。」
此外，Eason昨晚在銅鑼灣時代廣場擔任亮燈儀式嘉賓，問他聖誕節會如何度過？他說：「會準備新城下個月26號舉行嘅頒獎禮，其實好希望同屋企人相聚食餐飯。」有指其妻徐濠縈經常情緒不穩，他說：「已經教佢一齊控制脾氣。」
老公積穀防饑
問Eason近期努力工作，是否搵錢幫父親打官司，他說：「錢係唔係都要搵啦，趁後生搵嚟積穀防饑，始終喺娛樂圈嘅壽命唔係好長，足球員都係30幾歲就退休，呢幾年係自己嘅黃金時間，所以勤力啲，唔想將來同後生仔爭份幾千蚊嘅看更。」
採訪：DebbieLum、EricLam
攝影：RickyChan
