工業總會副主席鍾志平噚日宴請傳媒，飯局上提到創新設計，佢引述褲王楊釗嘅名言：「人冇我有，人有我精，人精我轉」，話做工業最緊要識變通，當年香港廠家做加工貿易OEM都可以搵到餐食，但今時今日國內OEM廠遍地都係，點樣先可以同人競爭？再加上𠵱家珠三角產業轉型，又提高工資，又限制污染高耗能物料進口，只差在冇明確同你哋講話幾時唔準再做加工貿易。
喺咁嘅環境下，鍾生又有乜好建議呢？佢話應考慮吓做啲增值業務，透過設計創新，為產品提升價值。其實都係冇乜新意。
下周起貿發局搞咗個創新科技及設計博覽，到時好多名設計師會發表演說，介紹吓點樣同啲產品做包裝。
另外，工總又會做紅娘，搵嚟設計師協會，同工總旗下嘅鐘錶、家品同珠寶業分組磋商，點樣可以幫到個行業。