富豪酒店（078）連升兩日，由上周五收市0.73元上番0.80元，且兩日升市成交比過去兩個禮拜都大增，走勢更明顯出現突破，股價不但重上10日同20日線之上，更升破短期下降軌，而MACD亦將出現雙牛入市訊號，以最小量度升幅計，短期股價可升越1元。
富豪股價轉強，傳到「㷫烚烚」嘅係分拆酒店REITs，但其實富豪本身仲有好多有利因素，少人提及。
第一，富豪在北京擁有一個龐大的地產發展計劃，日後發展完成，將會成為北京的新地標，呢輪內地房產股升勢撩人，好多隻股價都屢創新高，富豪吸引力亦應提升。
北京項目「晒士」好大，位於中央商業區朝陽區門外大街，相等於本港銅鑼灣黃金地段，可建樓面面積達460萬方呎，包括寫字樓、商場、酒店、住宅和停車場，總投資50億元，全部完成估計利潤有50億元，住宅及商場部份預期可在08年完成，食正北京奧運概念。
第二，香港酒店業空前好景，唔單止入住率高企90%以上，房租亦穩步上升。富豪在香港經營5間酒店，連埋擴建嘅房間超過3800間，又係食正呢個大浪，未來兩三年一樣咁好景，保守估計富豪今年酒店收益起碼有2至3成增長。
分拆有助反映資產值
講到分拆嗰瓣，只要一搞掂，股價就會起飛。富豪發行84.89億股，市值67.9億元，中期報告酒店物業估值145億元，計埋擴建部份可增至165億元，打個8折係132億元，富豪出售50%已可套現66億元，幾乎已等於成間公司嘅市值。
今年6月底，富豪每股備考NAV1.49元，擴建完成後增至1.69元，分拆REITs令優厚資產實值得以反映，富豪股價現時的不合理折讓將會大為收窄，以仍折讓30%計，股價已可升上1.18元。
博富豪分拆有好消息，現水平上車，年底前會有可觀回報。
郭兆誠