搵名人、紅星講飲講食，一般都會搵間「老相好」；面上貼金？畀面派對？點寫都硬係好似唔中肯！今日請嚟香港電台第二台名DJ周國豐、羅脗新同彭晴，佢哋一講就話要去銅鑼灣峰壽司：「每次行過都見好多人排隊！想食好耐，不過硬係食唔到！」邊做訪問、周國豐第一嚿「淚の卷」落肚，先是默然，然後眼眶兒一紅，唔通真係咁感動？
記者：朱崇德
攝影：陳陶鈞
收音機聽住羅脗新（Cuson）、彭晴（Jacqueline）剛放下《晨光第一線》聽筒，未及半刻鐘就見佢哋同周國豐聯袂走入峰壽司，「大家雖然私交幾深，但佢兩個要做清晨節目，而我嘅《國風國豐》就要夜晚7、8點開咪，平時除咗朋友請飲，都幾難三個聚首一齊食飯！」
周國豐 靜靜雞輪過籌
熟周國豐都知佢嘅嗜好係周圍食嘢！未做餐廳訪問之前，其實已經幾度嚟過微服私訪：「呢度引起我興趣原因，係任何時間嚟，都見到門口排住人龍；有晚9點幾嚟，一攞就係百幾號籌，再問樓面，知道只係輪到40幾，最後只好打消念頭！」
彭晴 迴轉壽司兒時開心回憶
Jacqueline話：「好鍾意迴轉壽司嗰種感覺，裏面好似有開心嘅兒時回憶；不過喺香港做得好、又受歡迎嘅唔係太多。」其實峰壽司喺銅鑼灣只開了2年多，馬上已成為排隊人氣舖，負責人永久保麗子表示：「峰壽司其實喺日本已經有30多年歷史！魚生會用日本飛機貨，壽司師傅亦係日本調派過嚟（3個）；我哋除咗會以最日本傳統方法做壽司外，亦會順住日本潮流調製新口味，好似抹茶?壽司同火炙壽司，都係由我哋喺日本原創！」
淚の卷$20/1碟6件
一嚟就係創新款式，以新鮮的Wasabi細切幼粒做成壽司卷；負責人麗子小姐話：「新鮮Wasabi一般只在高級日本料理店使用，因為價錢較昂貴！」叫淚の卷嘅原因，係嗰種攻鼻上腦感覺，令人眼淚直流！
周國豐：「成嚿放入口，就算𡁻爛晒，起初都冇乜嘢！但突然間從口中爆出Wasabi威力，先攻鼻、再上腦，真係喊得出嚟！」
淚の卷=催淚彈
淚の卷真係有「催淚彈」功效？起初我同3位DJ主持一樣，都有啲半信半疑（所以我私下帶咗眼藥水）！但當每人啪一嚿入口，起初都仲可以談笑風生，羅脗新仲笑周國豐個淚眼表情：「演得咁浮誇，驚唔驚影響Image呀？」突然彭晴亁咳兩聲，爆出嘩一聲；脗新突然除低眼鏡狂捽；國豐就簡直好似「食咗酸梅亁」嗰隻！雖然大家事前做足心理準備，但結果都係俾佢攻陷！
（編者按：據探子回報，記者先係現場最淚流滿面嗰個，而且仲因而中斷訪問2分鐘！）
筋子壽司$35
筋子壽司其實用的是三文魚子，特別處係魚子仍包裹在稀薄的魚卵膜中，可以話係最原汁原味的食法！
從來未見過亦未食過！筋子嘅口感介乎液態同固態之間，感覺非一粒粒，好似混成片魚子「醬」！味道鮮而唔腥，不過帶點鹹味。
火炙盛$60/1客3件
火炙盛係峰壽司自創的壽司做法，將壽司魚生以火槍輕輕燒燶表面，以增加甘香及入口即溶的口感，有鱆紅魚、魚背及海螺。
雖然燒過，但估唔到裏面仲保持到咁滑，而且入口即化，如果10分滿分，我會畀佢9分！
軟殼蟹卷$25
軟殼蟹即炸即做成壽司，入口鬆脆而甘香，薄薄的一層日本壽司米，醋味香濃消油膩，面層的黑魚子，增添了一份神秘感覺。
鵝肝壽司$35
足厚1cm的鵝肝加金箔，上枱時已相當震撼；放入口中鵝肝同壽司飯馬上溶掉，再加幼葱絲吊味，清新而毫不油膩。
小秘密
壽司糖小朋友限定
就算係熟客都未必知道峰壽司原來有壽司糖食！店員話只會派畀小朋友食，三文魚、赤貝、蛋、蟹柳、魚子款式乜都有！
睇埋環境
搵食資料
峰壽司（31882440）
地址：銅鑼灣白沙道12號地下
座位：68個 人均消費：$110
交通：銅鑼灣地鐵站F出口（渣甸街），上恩平道，第一個路口轉入白沙道。
最好賣：吞拿魚腩、海膽、三文魚、帶子
搵食策略：任何時段都見人龍，平均等位時間15-40分鐘；不過下午3:00-5:00係較少人搵食時間，唔想等餐懵可以呢段時間去食。
明日預告
追求健康生活嘅黃佩霞，連食飯都要揀健康材料，連佢囡囡都學埋佢㗎！