新任滙豐控股行政總裁紀勤，出名「快人快語」，講嘢同做事都如行軍領兵，雷厲風行。噚日佢首次喺香港同本地傳媒會晤，果然氣勢如虹，11點半準時踏入會議室，未坐定即自我介紹，又教記者讀其姓氏「Geoghegan」的正確發音，之後回答問題亦都係言簡意賅。
超音速步伐
呢位曾經喺香港及新加坡工作近10年嘅集團二號人物，向記者表示，日後會保持每季嚟亞洲區一次，同員工及客戶定期見面，又會喺滙豐總行34樓，保留一個辦事處，點解？「我鍾意呢個地區。」睇嚟亞洲區的確係獅子行嘅福地。
紀勤今年8月底，乘坐滙豐嘅私人飛機（原屬HouseholdInternational前主席WilliamAldinger使用，HI被滙控收購後成為集團資產），以12日「極速」時間，橫掃23個城市，涉足6.3萬公里，由拉丁美洲起行至北京終站，展開巡迴路演。
最為人津津樂道嘅係，佢喺04年初，甫任英國滙豐銀行行政總裁，即以超音速步伐，完成獅子行在英國千多間大小分行嘅「巡舖」行動，睇來呢位集團統帥，說話同行事速度，都係獨步天下，快人一籌。
[email protected]