黃佩霞（Almen）一向給人陽光健康的感覺，心想她一定會好注意飲食健康，點知Almen和囡囡Camelot竟然無懼近日的蘇丹紅雞蛋恐慌，仍然無蛋不歡，仲食得津津有味，究竟雞蛋有咩咁吸引佢哋呢？說到尾原來始終因為那兩個字—健康！
記者：林思樂
攝影：陳偉強
加州口味健康多元化
事前打電話約Almen介紹心水餐廳，她第一時間說Red最啱心水，吓！佢係Red的老闆，咁咪即係乘機宣傳？但係諗真啲，自己開的餐廳最合自己心意亦無可厚非，真係無佢符。而Red標榜新加州口味，即是集各國大成的Fusion菜，因為加州有一半人口來自意大利、墨西哥、日本及中國，口味十分多元化，而且加州菜一向着重健康，因此Red不論在用料和烹調方法都講求天然，用上大量新鮮蔬果，差不多每一樣菜式都有齊各類營養，非常均衡。
食蛋白最健康
點解Almen咁鍾意食蛋？皆因蛋白質豐富且飽肚。其實肉類都有蛋白質，但Almen話：「肉類多脂肪不夠健康，比較少脂肪的肉又好難煮得好食，例如雞胸好少脂肪，但係通常好「嚡」。而雞蛋嘅烹調方法簡單，又可配搭不同材料，多變化，小朋友最鍾意。我老公好鍾意健身，蛋白質對肌肉生長好有幫助，所以佢每日食1隻蛋黃3隻蛋白，因為蛋黃有膽固醇，多吃無益，但是蛋白就既含豐富蛋白質，又無膽固醇，多吃也不怕。」
菌類蔬菜第二最愛
除了雞蛋，Almen的第二最愛是菌類，因為菌類肉質細嫩，種類多，每款都有不同口味，且含高蛋白低脂肪。Almen話：「我平日會在超級市場買大大塊的菇，在家裏用微波爐叮一分鐘，加少少鹽和胡椒就食得。菌類唔可以煮得太熟，否則會太腍不夠爽。」此外，Camelot就從小已經好鍾意食蔬菜，特別喜歡大葉蔬菜吸晒餸汁好滋味，而Red的菜式差不多樣樣都有蔬菜，尤其愛用萵苣類蔬菜（RocketLeaf），帶有少少胡椒味道，沒有草青味，做沙律一流，加些少橄欖油食已經好好味。
蛋白奄列
這菜式係Almen和囡囡Camelot嘅至愛，將青瓜、車打芝士、番茄及燈籠椒加入蛋白中，再加入低脂奶，用橄欖油煎至金黃色，十分香口，難怪小朋友咁鍾意食。
美國蛋放心食
近日湖北神丹牌雞蛋發現致癌化學物蘇丹紅，好多人因此聞蛋色變。食物環境衞生署已表明香港沒有入口神丹牌雞蛋，而Almen完全冇有怕，非常放心畀囡囡食，因為Red用嘅全是美國入口的雞蛋，保證沒有問題。
烤大白菌
Almen至愛美國入口的Portobello大白菌，經常買返屋企親自下廚。將Portobello配以洋葱烤至略熟，可以保持爽口。食落完全沒有草青味，十分鮮甜。
辣味吞拿魚及大蝦
海鮮含豐富蛋白質，菜式採用澳洲吞拿魚和大蝦，吞拿魚面頭熟中間生，所以不覺「嚡」。配以日本冷麵底，鮮甜彈牙低脂肪。只以少少辣椒粉吊味，唔食得辣的都啱食。
蒸比目魚柳伴蔬菜
Camelot最鍾意食啲沾滿汁的蔬菜，所以呢個餸啱晒佢。將比目魚用鹽調味後蒸熟，再用蔬菜包住，澆上紅蘿蔔汁。魚肉新鮮嫩滑，味道甜甜哋非常清新。
茄子番茄芝士多士
將茄子、番茄與車打芝士撈勻，鋪在黑麥包多士上。黑麥包咬落鬆軟，而且糖份低、纖維高，可口又夠營養，亦是Almen喜愛嘅小食之一。
靚位任你揀
一大班人必坐長梳化，這兩張長梳化可以坐十幾個人，坐得舒服又可坐得親密啲。
大片草地讓小朋友舒展筋骨
Camelot最鍾意跑來跑去，Almen話Camelot平日去其他餐廳要坐定定，好快就嗌悶問幾時走得。而這裏的露天茶座地方夠大，可以讓她到處跑。Camelot一來到就跑上草地不停跳，玩到累先埋位開餐，所以零舍開胃。
睇路搵食
REDBar+Restaurant（81298882）
地址：中環國際金融中心商場2期4樓4012-4018號舖
營業時間：
星期一至四11:30am-12:00mn
星期五、六11:30am-3:00am
星期日及公眾假期11:30am-10:00pm
座位：約150個
交通：中環地鐵站A2出口
明日預告
施明同兩個仔仔好鍾意食北京菜，佢哋仲學人拉麵㖭！