大市終於出現一個似樣嘅調整，恒指噚日跌228點，唔少散戶再次大叫「熊來了」。港股由6月低位以來，最多升咗4000點，其間出現過幾次單日大震盪，最終都係有驚無險。嗌咗咁多次「熊來了」，有啲散戶如驚弓之鳥，一見跌市即刻走為上着；有啲散戶盤算住點樣執平貨；最無助嘅係一啲唔知點算好嘅散戶。
早排勢不可擋嘅交通銀行（3328），連續3個交易日下跌，高位上咗車嘅散戶，開始覺得迷惘，𠵱家正係唔知點算好。隻股噚日收報7.04元，跌14仙。
喺《Uwants.com討論區》入面，CubicMan噚日問：「7.04入，揸咗一段時間，高位冇放，𠵱家就冇咩頭緒，可唔可以畀吓意見？」
同行齊升獨自腳軟
mcl20對呢隻股充滿信心：「7元係鐵線，短炒唔跌穿呢個價唔使驚住，長線低過呢個價考慮增持。」
a931675就建議畀啲耐性：「發A股，處收集期，橫行要等！」
toby88亦係大好友：「應該7元邊有支持，如果你睇長線，根本唔使擔心。」大運船認為，7.02元之下不妨買多啲，7.1元樓上逐啲減持。
5隻喺香港上市嘅國有商業銀行中，交行近排係最強勢嘅一隻，亦係最早見頂回落嘅一隻。噚日中行（3988）、建行（939）、工行（1398）同招行（3968）繼續撐住大市，交行卻獨自腳軟，相信最主要原因係近排升勢過於急勁，當大行發表報告睇淡時，散戶即嚇至雞飛狗走。
根據彭博嘅資料，由上星期四至噚日，共有17間證券行發表報告評論交行，其中6間建議「跑輸大市」或「沽售」，包括美林、德銀同花旗等；另有5間證券行評之為「跑贏大市」或建議「買入」，包括高盛同麥格理等；其餘6間則持中立意見。
交行早前咁升法，即使有大行出嚟唱好，大家都唔會有驚喜，反而大行唱淡，大把人跟手沽貨，所以呢三日由7.56元高位跌到噚日最低6.93元，亦可以理解。
照睇圖，交行暫時喺7蚊有支持，但較穩陣嘅支持位喺保歷加通道中軸6.45元左右，如果諗住長線投資，不妨畀少少耐性，喺6.45元附近收集，相信整固完後，可以破頂挑戰8蚊。
余文