玖龍紙業（2689）噚日股價再升近一成，市值暴增至558億元，如此升勢，恐怕好快就可以加入成為恒指成份股。玖龍開市已經狂升，但同業理文造紙（2314）早市還壓在17.70元水平，因為中午公布業績，炒家唔敢亂博，到下午業績對辦，沽盤才輕易被掃甩，但升幅不足5%。
玖龍之所以急升，主要因為日前有國內報章披露，集團與江津珞璜工業園正式簽署投資協議，將投資120億元在重慶建立生產基地，成為繼廣東東莞、江蘇太倉之後，玖龍紙業在內地的第3個生產基地。
今日有機追落後
至於理文造紙中期業績，半年純利4.1億元，增長33%，業績增長主要受惠於第7條生產線投產。唔知係咪因為睇見玖龍百億擴產大計令股價急漲，理文造紙管理層於記者會隨即宣布在原有29億擴產大計中，再加碼15.8億元，且看理文造紙今日會否續追落後？至於家族內另一工業股理文集團（746）旗形整固一輪後昨初現突破，亦都值得留意。
股仔怡邦行（599）連續2日股價大升，噚日再升38%，自從周一有專欄作家推介後已經急升60%。怡邦行日前公布截至今年9月底半年業績，股東應佔盈利1512萬元，較對上年度416萬元大升2.63倍，每股盈利7.56仙，如果下半年盈利同上半年一樣，全年盈利有3000萬，PE約6倍，唔怪得咁升法。呢間公司從事進口及銷售建築五金及浴室設備，供應畀香港及中國之地產發展項目，及賣畀批發及零售客戶，賣點之一係開發緊澳門市場。
歐陽風