酒店管理係德國人、瑞士人世界，幾乎所有五星級酒店嘅管理層，由總經理至餐飲總監，都有德國或瑞士人佔領高位。呢日喺會所內碰到一位餐飲專家，向佢請教西餐飲食之道，講講吓，先知道佢係瑞士人，於是問佢點解酒店係德瑞人士壟斷。呢位專家話：「德裔人士天性嚴謹，幼承庭訓就係守紀律，講規矩，律己嚴。你唔好以為酒店管理係好玩，夜夜笙歌、美酒佳餚，其實係好鬼死悶，而且工作時間長，日日如是。高層重要識得腌尖挑剔。呢類工種，最啱德國瑞士人嘅脾性。」講得咁鬼死板，唔通靈活應變，迎合客人特殊需要等工夫，就可以唔理？專家話：「非也。變通一定要，但唔可以在課室教，要從實踐中爭取經驗，我自己在廚房從低做起，經常有突發事故，如果你冇經驗，邊度識得靈活變通？我哋讀完酒店管理，個個都從低做起㗎，做房間部嗰陣，遇到人客喺午夜放對鞋喺房門口，我自己要親自郁手擦鞋㖭。冇做過呢啲事，以後就未必識得隨機應變。」
佢講番一次「考牌」故事，甚為有趣，三十年前，佢喺一間馬尼拉五星豪華酒店做低級經理，久唔久就有中東豪客殺到。一次某中東要員連隨從包咗成層樓，飲最靚嘅酒，係正牌大豪客，酒店自然刻意逢迎。要員突然要求，佢哋二十人（全男）想開派對，想搵四十位大學女生陪玩。嘩，酒店總經理唔敢推卻，但又驚出事，一方面叫專家去搵大學女生，另一方面就叫保安去紅燈區「馬邊尼」搵定年青吧女做後備。專家話：「其實馬邊尼區有唔少女大學生搵錢交學費！」時屆，派對開得成，班真正女大學生扮得似醜小鴨，馬邊尼女生扮到似波姬小絲，最靚威士忌飲過三巡之後，真正女學生借口告辭，留低嘅馬邊尼女士就半推半就，欲拒還迎咁樣出擊，中東人大樂，埋單好襟計，次日要員仲讚酒店總經理有辦法㖭。呢位瑞士人話：「經歷實戰之後，咪識得點樣變通，點樣預測客人需要囉，我𠵱家一睇住客嘅人種面貌，就估到七八成佢會需要乜嘢服務！」