十一月十七日嘅報紙有四單人物消息，就係（一）劉鑾雄以一億三千幾萬港紙買入安地華荷（AndyWarhol）嘅毛澤東絲網作品，（二）佛利民逝世，（三）胡應湘以天價買入白松露菌（一百二十五萬元），宴請四十位名人做善事，（四）美國國會圖書館頒發二○○六年克魯格（JohnW.KlugePrize）獎，得獎者係余英時與JohnHopeFranklin兩位大名鼎鼎嘅歷史學家。
一如所料，劉鑾雄上頭版，胡應湘在名人八卦版，佛利民在新聞內頁。至於余英時，對唔住，只有一小段，大部份報紙完全不提。香港讀者嘅口味（或在報紙總編輯腦袋想像出來嘅讀者口味），以著名富豪八卦料為先，知識與大學者為末，一眼見晒。
人哋用百零萬買白松露菌，一晚食晒，唔關我哋事；大富豪出手闊綽，億零銀買PopArt以及文化（counterculture）殿堂級人物嘅作品，如果收埋喺屋企，公眾亦冇感覺，如果佢肯「長借」畀文物館公開展覽，咁又唔同；佛利民嘅影響力，人所共知，輪唔到香港人擦鞋，畢竟已經九十四歲，平時冇乜大病痛，猝然逝世，呢位經濟學大師可講係含笑九泉。
至於克魯格獎，係西方人文學界大事，克魯格呢位靠傳媒發達嘅大富豪認為諾貝爾獎忽略咗歷史、政治、社會學、哲學、人類學、宗教、語言學、批評學等等，特別喺三年前捐出七千三百萬美元，畀國會圖書館設立一個人文學（humanities）獎，獎金一百萬美元，相等於諾貝爾獎獎金。今年嘅得主有兩位，共享一百萬美元，其中Franklin（九十一歲）係杜克大學榮休教授，以黑人歷史著作享盛名。余英時（七十六歲），新亞書院第一屆（一九五二）文史系畢業生，師從錢穆，係普林斯頓榮休教授。消息宣布後，普林斯頓大學報紙（Princetonian）大字標題，「余英時贏得克魯格獎──歷史學家的諾貝爾」，指余英時係「我們一代最偉大的中國思想史學者」。可憐香港大部份報紙對呢位本地學校歷來產生最傑出嘅歷史學家得獎消息，毫不理會，良可嘆也。